Prezident Mirziyoyevning BMT 80-sessiyasidagi ishtirokini tahliliy ko‘z bilan: Yangi O‘zbekiston — global muloqat tashabbuskori

2025 yil sentyabr oyida Nyu-York shahrida bo‘lib o‘tgan Birlashgan Millatlar Tashkiloti Bosh Assambleyasining 80-yubiley sessiyasi tarixiy ahamiyatga ega global voqeliklar silsilasini yanada chuqur anglash va xalqlararo hamkorlikni mustahkamlash nuqtai nazaridan muhim platforma bo‘lib xizmat qildi. Ushbu sessiyada O‘zbekiston Respublikasi Prezidenti Shavkat Mirziyoyevning ishtiroki va nutqi nafaqat milliy manfaatlarni ilgari surish, balki mintaqaviy va global muammolar bo‘yicha aniq va asosli pozisiyalarni bayon etish nuqtai nazaridan ham ahamiyatli bo‘ldi.

Markaziy Osiyoning xalqaro siyosiy sahnadagi nufuzi ortib bormoqda. Prezident Mirziyoyev o‘z chiqishida Markaziy Osiyoni barqaror rivojlantirish, uni global xatarlardan muhofaza qilish va mintaqaviy hamkorlikni chuqurlashtirish masalalariga alohida e’tibor qaratdi. Ushbu pozisiya, bir tomondan, O‘zbekistonning mintaqada yetakchi davlat sifatidagi nufuzini ko‘rsatsa, ikkinchi tomondan, mamlakat tashqi siyosatidagi pragmatik va hamkorlikka asoslangan yondashuvini namoyon etadi.

Inson huquqlari va adolat — nutqning markaziy nuqtasi. Prezident o‘z nutqida inson huquqlari, adolat va qonun ustuvorligi kabi masalalarni ilgari surdi. Bu «Yangi O‘zbekiston» islohotlar siyosatining xalqaro maydondagi tabiiy davomi sifatida baholanishi mumkin. Prezident tomonidan ta’kidlangan ijtimoiy barqarorlik, ta’lim, sog‘liqni saqlash va gender tengligi bo‘yicha tashabbuslar BMT kun tartibidagi “2030 Barqaror rivojlanish maqsadlari” bilan uyg‘unlikda ekanini ko‘rsatadi.

Afg‘oniston masalasi — dunyo jamoatchiligiga da’vat. Afg‘onistondagi vaziyatga alohida to‘xtalib, Prezident Mirziyoyev xalqaro hamjamiyatni ushbu davlatni yakkalab qo‘ymaslikka, balki inklyuziv muloqot orqali uni jahon taraqqiyotiga jalb etishga chaqirdi. O‘zbekistonning Afg‘onistonda tinchlik o‘rnatishda faol va amaliy ishtirokini yana bir bor tasdiqlovchi ushbu chaqiriq BMT minbari orqali berilgan muhim diplomatik signal bo‘ldi.

Global xavf-xatarlar va O‘zbekistonning pozisiyasi. Prezident Mirziyoyev nutqida iqlim o‘zgarishi, oziq-ovqat xavfsizligi, energetika inqirozi va terrorizmga qarshi kurash kabi global muammolarga alohida e’tibor qaratdi. Uning fikricha, bu muammolarni biror-bir davlat yoki mintaqa alohida hal qilishi mumkin emas — faqatgina global birdamlik va hamjihatlik orqali yechim topiladi. Bu pozisiya O‘zbekistonning xalqaro munosabatlarda konstruktiv va barqaror rivojlanish tarafdori ekanini ko‘rsatadi.

Xalqaro tashabbuslarning davomiyligi va yangilanishi. Prezidentning tashabbuslari orasida “Global ta’lim forumi”, “Iqlim o‘zgarishiga qarshi Markaziy Osiyo forumi”, hamda “Islom sivilizatsiyasi va tolerantlik” mavzusidagi xalqaro konferensiyalar o‘tkazish takliflari ayniqsa e’tiborga molik. Bu kabi tashabbuslar O‘zbekistonning dunyo miqyosidagi intellektual va madaniy maydondagi ta’sirini kengaytirishga qaratilgan.

Xulosa qilib aytganda Yangi O‘zbekiston — xalqaro munosabatlarda ishonchli hamkorlik muhim o‘rin tutadi. Shavkat Mirziyoyevning BMT minbaridan so‘zlagan nutqi — bu oddiy diplomatik chiqish emas, balki muvaffaqiyatli islohotlar natijasida xalqaro nufuzini mustahkamlayotgan, global siyosiy-iqtisodiy jarayonlarga ta’sir ko‘rsata oladigan davlat pozisiyasining ifodasi bo‘ldi.

BMTning 80-yubiley sessiyasidagi ishtirok O‘zbekiston tashqi siyosatida yangi bosqichni boshlab bermoqda. Unga ko‘ra, mamlakat nafaqat o‘z hududida, balki butun mintaqada va hatto global darajada tinchlik, taraqqiyot va adolat sari harakat qilayotgan faol ishtirokchiga aylanmoqda.

Nargiza Abdullayeva, Xalq deputatlari viloyat Kengashi deputati

⚡️ @sam_vil_deputatlari