Ishonchni
qozonish — masʼuliyatdir  

Mahalliy Kengash deputati bo‘lish — aslida fidoyilik,
odamlar dardu tashvishi, quvonchiga sherik bo‘lib yashash demakdir. Chunki
deputat har kuni yoki kunora ish yuzasidan, yoxud ko‘cha-ko‘yda saylovchilariga
duch keladi. 

 Uchrashuv,
tadbir yoki sayyor qabulda biror muammoni hal etishda amaliy yordam berishni
vaʼda qilib, uni bajara olmasa, xoh ishida, xoh tadbirda bo‘lsin, yuzi shuvut
bo‘ladi. Bugungi ochiqlik va oshkoralik davrida esa ayrimlar “saylagan
deputatimiz vaʼdaboz ekan, vaʼda berib bajarmadi” deb yuziga solishdan ham
tortinmaydi. 

 Buni
yaxshi anglagan O‘zMTDP faoli, xalq deputatlari Navbahor tuman Kengashi
deputati Bunyod Tashanov o‘zi saylangan hudud — 2-"Navro‘z" saylov
okrugida aholi bilan muntazam ravishda yuzma-yuz uchrashuvlar, sayyor qabullar
o‘tkazishni odatiga aylantirgan. Ularda aholi tomonidan ko‘tarilgan muammolarni
chuqur o‘rganib, ularni ijobiy hal etish bo‘yicha muntazam ish olib bormoqda. 

  Bu esa saylovchilarning deputatga, partiya g‘oya va maqsadlariga bo‘lgan
ishonchini oshishiga xizmat qilmoqda. 

  Xususan,
B. Tashanov aholi murojaatlari asosida “Qizilrabot” mahalla fuqarolar
yig‘inidagi sport maydonchasi va mahalla maʼmuriy binosini qurish, shuningdek,
10 km ichki yo‘llarni asfaltlash ishlarini deputatlik nazoratiga oldi. 

  Natijada,
deputat aralashuvi bilan qisqa muddatda mahallada sport maydonchasi va mahalla
binosi qurildi, ichki yo‘llar to‘liq asfalt qilindi hamda aholi uchun tungi
yoritkichlar o‘rnatildi.