ОНА ТИЛИМИЗ — МИЛЛИЙ ҒУРУРИМИЗ ВА БЕБАҲО ҚАДРИЯТИМИЗ
Туман Маданият марказида 21 октябрь — Ўзбек тилига давлат тили мақоми берилган кун муносабати билан тантанали тадбир бўлиб ўтди.
Унда Халқ депутатлари Янгиқўрғон тумани Кенгаши депутати, туман ҳокими Нажмиддинов Асадулла Икромович, туман Кенгаши раиси Мамажонов Равшан Раҳмонжонович, муассаса, ташкилот ва корхоналар раҳбарлари, нуронийлар, ёшлар ҳамда жамоатчилик фаоллари иштирок этди.
Тадбирда сўз олган туман Кенгаши депутати, туман ҳокими Асадулла Нажмиддинов иштирокчиларни байрам билан табриклаб, ўзбек тилининг халқимиз ҳаётидаги беқиёс ўрни, миллий ўзлигимиз ва маънавий қадриятларимизни сақлашдаги аҳамиятига тўхталди.
Она тилимизни асраб-авайлаш, унинг нуфузини янада ошириш, ёш авлодни тилимизга ҳурмат ва садоқат руҳида тарбиялаш ҳар биримизнинг муҳим вазифамиз экани таъкидланди.
🏅 Тадбир давомида Ўзбекистон Республикаси давлат мустақиллигининг 35 йиллиги муносабати билан «Шуҳрат» медали билан тақдирланган 10-сонли умумтаълим мактаби ўқитувчиси С. Умарованинг эришган ютуқлари алоҳида эътироф этилди.
Шунингдек, давлат тилининг ривожи, унинг жамиятдаги мавқеини юксалтириш ҳамда ёш авлодга она тилимизнинг бой имкониятларини етказишга муносиб ҳисса қўшиб келаётган бир гуруҳ ўқитувчиларнинг меҳнати рағбатлантирилди.
🤝 Она тилига эҳтиромни юксалтириш, миллий қадриятларни тарғиб этиш ва маънавий-маърифий ишларга кўмаклашиш депутатлик фаолиятида ҳам муҳим аҳамият касб этади. Бу борада халқ вакилларининг таълим муассасалари ҳамда жамоатчилик билан ҳамкорлиги ёшларда миллий ғурур туйғусини мустаҳкамлашга хизмат қилади.
Тантанали тадбир она тилимизга бўлган ҳурмат ва эҳтиром, миллий қадриятларимизга садоқат туйғуларини янада мустаҳкамлашга хизмат қилди.