ELEKTR TA’MINOTINI YAXSHILASH MASALASI SESSIYADA KO‘TARILDI

Xalq deputatlari Sho‘rchi tumani Kengashining VII chaqiriq yigirma to‘rtinchi sessiyasida mahallalarda elektr ta’minoti infratuzilmasini yaxshilash va jamg‘arma mablag‘laridan samarali foydalanish masalalari yuzasidan deputatlik savoli bildirildi.

Jumladan, Xalq deputatlari Sho‘rchi tumani Kengashiga 7-“Yoshg‘ayrat” saylov okrugidan saylangan deputat, O‘zbekiston Xalq demokratik partiyasi deputatlik guruhi a’zosi Rajabov Botir Abdurasulovich fuqarolarning ko‘plab murojaatlari va deputatlik so‘rovlarini inobatga olib, “Ko‘klam” mahallasining Ko‘klam ko‘chasida, “Yoshg‘ayrat” mahallasining ayrim hududlarida hamda Yuksalish ko‘chasida elektr ta’minotini yaxshilash maqsadida temir-beton ustunlar o‘rnatish va zamonaviy yopiq SIP kabellarini tortish ishlarini tegishli ro‘yxatga kiritish masalasini ko‘rib chiqish taklifini bildirdi.
Shuningdek, deputat tomonidan “Infratuzilma va ijtimoiy barqarorlik” jamg‘armasida ayni paytda qancha mablag‘ mavjudligi haqida savol berildi.

Bildirilgan savol va takliflarga javoban tuman hokimining birinchi o‘rinbosari — Iqtisodiyot va moliya bo‘limi boshlig‘i
M. Chorshanbiyev mazkur mahallalarning ayrim ko‘chalarida temir-beton ustunlar o‘rnatish va SIP kabellarini tortish ishlarini tegishli ro‘yxatga kiritish masalasi ko‘rib chiqilishini bildirdi.

Shuningdek, hozirgi kunda jamg‘armada 416,0 million so‘m mablag‘ mavjudligi ma’lum qilindi. Tuman hokimining birinchi o‘rinbosari deputatlardan ushbu mablag‘larni mahallalardagi infratuzilmani yaxshilash va aholini qiynayotgan muammolarni bartaraf etishga yo‘naltirishda amaliy yordam ko‘rsatishni so‘radi.

Mazkur masala mahallalarda elektr ta’minoti barqarorligini oshirish, eskirgan infratuzilmani yangilash va fuqarolar murojaatlarida ko‘tarilgan muammolarni bosqichma-bosqich hal etishda muhim ahamiyat kasb etadi.

Deputatlik tashabbusi — aholi muammolarini kun tartibiga olib chiqish va ularning amaliy yechimi uchun mas’ul tashkilotlar bilan hamkorlikni kuchaytirish demakdir.

✍️Xalq deputatlari Sho‘rchi tumani Kengashi Matbuot xizmati