Xalq deputatlari tuman Kengashining 2026-yilga mo‘ljallangan ish rejasiga muvofiq O‘zbekiston “Milliy tiklanish” demokratik partiyasidan saylangan deputat M.Aynashova tomonidan tumanning “Pargos” mahallasida joylashgan 9-sonli umumta’lim maktabi binosi holati va ta’lim berish uchun yaratilgan sharoitlar yuzasidan o‘rganish o‘tkazildi.

O‘rganish davomida maktab binosining ayrim qismlari ta’mirtalab holatga kelib qolgani aniqlandi. Xususan, deraza va eshiklarining eskirgani, tashqi devorlardagi suvoq qatlamlarining ko‘chib ketgani, shuningdek, binodagi pollarni ta’mirlash zarurati mavjudligi qayd etildi. Mazkur holatlar maktab binosining tashqi ko‘rinishi bilan bir qatorda, uning umumiy holati va o‘quvchilar uchun qulay ta’lim muhitini ta’minlash masalalariga ham ta’sir ko‘rsatishi mumkinligi ta’kidlandi.

🔺Shuningdek, o‘quv xonalari va ta’lim jarayonini tashkil etish bilan bog‘liq sharoitlar ham ko‘zdan kechirildi. Mavjud kamchiliklarni bosqichma-bosqich bartaraf etish, binoda ta’mirlash ishlarini amalga oshirish orqali o‘quvchilar va pedagoglar uchun yanada qulay sharoit yaratish zarurligiga e’tibor qaratildi.

🔺Mazkur muammolarni bartaraf etish maqsadida maktab binosida zarur ta’mirlash ishlarini amalga oshirish bo‘yicha har yilgi Ijtimoiy va ishlab chiqarish infratuzilmasini rivojlantirish dasturiga kiritish yuzasidan tegishli taklif berish belgilandi.