Xalq deputatlari Boyovut tumani Kengashi kotibiyati xodimlari tajriba almashish hamda faoliyat samaradorligini yanada oshirish maqsadida xalq deputatlari Xovos tumani Kengashi kotibiyatiga tashrif buyurdi.

Tashrif davomida Xovos tumani Kengashi kotibiyatining ish faoliyati, deputatlar bilan hamkorlikni yo‘lga qo‘yish, deputatlarning faoliyatini muvofiqlashtirish, deputatlik so‘rovlari bilan ishlash, fuqarolar murojaatlarini o‘rganish va nazoratga olish, Kengash qarorlari hamda topshiriqlar ijrosini ta’minlash borasidagi tajribalar o‘rganilmoqda.

Shuningdek, deputatlarning faoliyatini baholash, ularning reyting va KPI ko‘rsatkichlarini shakllantirish, deputatlar faoliyatini ommaviy axborot vositalari va ijtimoiy tarmoqlarda muntazam yoritib borish, Kengashning ochiqligi va shaffofligini ta’minlash masalalari yuzasidan ham o‘zaro fikr almashildi.

Muloqot davomida har ikki tuman Kengashi kotibiyatining ish jarayonida qo‘llanilayotgan samarali usullar, mavjud muammolar va ularning yechimlari haqida fikr almashilib, ilg‘or tajribalarni amaliyotga joriy etish bo‘yicha takliflar bildirildi.

Bunday tajriba almashuvlar Kengash kotibiyatlari faoliyatini yanada takomillashtirish, deputatlar bilan ishlash samaradorligini oshirish hamda hududiy Kengashlar faoliyatida ilg‘or tajribalarni ommalashtirishga xizmat qiladi.