📌 DEPUTATLIK SO‘ROVI: KATTABOG‘ MAHALLASIDAGI MUAMMOLAR O‘RGANILDI

Xalq deputatlari Sherobod tumani Kengashi deputati tomonidan Kattabog‘ mahallasidagi A. Navoiy ko‘chasida istiqomat qiluvchi fuqarolarning elektr ta’minoti va yo‘l infratuzilmasi bilan bog‘liq murojaatlari o‘rganildi.

🔎 O‘rganish davomida mahallada 5 ta ko‘chaga A. Navoiy nomi berilgani, shundan 3 ta ko‘chada 3 yil avval elektr ta’minotini yaxshilash maqsadida beton ustunlar o‘rnatilib, yopiq kabel tarmog‘i tortilgani, biroq qolgan 2 ta ko‘chada ushbu ishlar yakunlanmay qolganligi ma’lum bo‘ldi.

Hozirgi kunda mazkur ko‘chalarda elektr ustunlari yetarli emasligi hamda elektr tarmog‘idagi kuchlanish darajasi juda pastligi kuzatilmoqda. O‘rganish jarayonida ayrim nuqtalarda elektr kuchlanishi 100 voltga ham yetmasligi qayd etildi.

Shuningdek, ushbu ko‘chalarda yo‘lni asfaltlash maqsadida tekislash ishlari amalga oshirilgan bo‘lsa-da, asfalt qoplamasini yotqizish ishlari hozirga qadar yakunlanmagan.

📄 Mazkur masalalar yuzasidan Sherobod tumani hokimining o‘rinbosari — tuman Obodonlashtirish boshqarmasi boshlig‘i Musayev Elbek Jo‘rayevich nomiga deputatlik so‘rovi yuborildi.

Deputatlik so‘rovida mazkur masalalarni tegishli tartibda o‘rganib chiqish, mavjud muammolarni bartaraf etish yuzasidan imkon qadar amaliy yordam ko‘rsatish, shuningdek, masala bo‘yicha o‘z nuqtai nazari va ko‘rilishi rejalashtirilayotgan choralar haqida qonunchilikda belgilangan tartibda yozma javob taqdim etish so‘ralgan.

📌 Deputatlik so‘rovi: muammoni aniqlash emas, uning yechimiga amaliy ko‘mak berish vositasidir.

Xalq deputatlari Sherobod tumani Kengashi kotibiyati matbuot xizmati.