Xalq deputatlari Bo‘zatov tumani Kengashi 8-"Erkindaryo" saylov okrugidan (O‘zLiDeP) deputat J.Jumanazarov va Kengash kotibiyati bosh mutaxassisi K.Aytmuratov bilan birgalikda o‘z saylov okrugi hududidagi Erkindaryo suv yetkazib berish stansiyasi (EKOS) faoliyati bilan tanishish maqsadida o‘rganish olib borildi.
O‘rganish davomida ichimlik suvi yetkazib berish stansiyasining texnik holati, ichimlik suvini yetkazib berish tizimi, qurilma va uskunalarning ishlash holati hamda aholini toza ichimlik suvi bilan grafik asosida ta’minlash bo‘yicha olib borilayotgan ishlar ko‘rib chiqildi.
Shuningdek, suv yetkazib berishda yuzaga kelishi mumkin bo‘lgan muammolar, ularning oldini olish choralari va xizmat sifatini yanada yaxshilash masalalari yuzasidan tegishli mutaxassislar bilan fikr almashildi. O‘rganish natijasida suv yetkazib berish stansiyasidagi suv tozalovchi filtrlar eskirib almashtirish holatiga kelib qolgan.
O‘rganish yakunida deputat tomonidan aholining sifatli ichimlik suvi bilan ta’minlanishini yanada mustahkamlash, stansiya faoliyati samaradorligini oshirish bo‘yicha takliflar bildirildi va bu masala yuzasidan deputatlik so‘rovi chiqarilishi belgilab olindi.