Xalq deputatlari Dehqonobod tumani Kengashining Ijtimoiy soha, yoshlar siyosati, madaniyat va sport masalalari bo‘yicha doimiy komissiyasi a’zolari, ijro organi vakili – tuman hokimligi bosh mutaxassisi M. Shaymanov hamda tuman Kengashi kotibiyati bosh mutaxassisi B. Panjiyev ishtirokida tuman "Nuroniylar" jamg‘armasi bo‘limida joyiga chiqqan holda o‘rganish ishlari olib borildi.

O‘rganish davomida O‘zbekiston Respublikasi Prezidentining 2024-yil 25-noyabrdagi PQ–405-sonli "Kambag‘allikdan farovonlik sari" dasturini amalga oshirishga faol nuroniylarni jalb etish chora-tadbirlari to‘g‘risidagi qarorining tumandagi ijrosi, xususan, 2026-yil birinchi yarim yilligi yakunlari bo‘yicha amalga oshirilgan ishlar, erishilgan natijalar hamda mavjud muammolar atroflicha tahlil qilindi.

Shundan so‘ng, doimiy komissiyaning navbatdagi yig‘ilishi bevosita "Nuroniylar" jamg‘armasi bo‘limida o‘tkazildi. Yig‘ilishda jamg‘arma bo‘limining mazkur masala yuzasidan axboroti eshitilib, qaror ijrosi holati keng muhokama qilindi.

Muhokamalar yakunida doimiy komissiyaning tegishli xulosasi qabul qilinib, mazkur masalani Xalq deputatlari Dehqonobod tumani Kengashining VII chaqiriq 26-sessiyasi kun tartibiga kiritish hamda belgilangan tartibda tegishli qaror qabul qilish uchun tavsiya etish yuzasidan qaror qabul qilindi.

Xalq deputatlari Dehqonobod tumani Kengashining doimiy komissiyalari tomonidan davlat dasturlari va normativ-huquqiy hujjatlar ijrosini joyiga chiqqan holda o‘rganish, mavjud holatni atroflicha tahlil qilish hamda masalalarni sessiyaga puxta tayyorlash ishlari izchil davom ettirilmoqda.