#jamoatchilik_nazorati #deputatlik_faoliyati #Andijon_shahar #24_tavsiya 

Xalq deputatlari Andijon viloyati Kengashi kotibiyati mudiri N.To‘ychiyeva tomonidan Andijon shahri Jumabozor MFY hududida o‘rganish ishlari tashkil etildi. Mazkur o‘rganishda mahalla yoshlar yetakchisi, hokim yordamchisi, ijtimoiy xodim, mahalla raisi hamda shahar Kengashi kotibiyati mudiri B.Mo‘ydinov faol ishtirok etdi.

O‘rganish jarayonida mahallada yoshlar bilan ishlash tizimi batafsil ko‘zdan kechirildi. Xususan, yoshlar yetakchisi tomonidan amalga oshirilayotgan ishlar — yoshlar bandligini ta’minlash, ularni kasb-hunarga yo‘naltirish, tadbirkorlikka jalb etish hamda bo‘sh vaqtlarini mazmunli tashkil etish borasidagi tashabbuslar tahlil qilindi. Ayrim ijobiy natijalar bilan bir qatorda, mavjud muammolar va yechimini kutayotgan masalalar ham ochiq muhokama etildi.

Shuningdek, “mahallabay” va “yoshlarbay” ishlash tizimi doirasida yoshlar bilan manzilli ishlash, ularning qiziqishlari, ehtiyojlari va muammolarini aniqlash hamda tezkor yechimlar topish bo‘yicha olib borilayotgan ishlar samaradorligiga alohida e’tibor qaratildi. Yoshlar bilan bevosita muloqotlar o‘tkazilib, ularning fikr va takliflari tinglandi.

Uchrashuv yakunida mas’ullarga ish samaradorligini yanada oshirish, ayniqsa, ishsiz yoshlarni band qilish, ularni zamonaviy kasb-hunarlarga o‘qitish, startap va loyihalarni qo‘llab-quvvatlash, shuningdek, ijtimoiy himoyaga muhtoj yoshlar bilan individual ishlashni kuchaytirish yuzasidan aniq vazifalar belgilab berildi. Bu kabi o‘rganishlar hududlarda yoshlar siyosatini yanada takomillashtirish va amaliy natijadorlikni oshirishga xizmat qilishi ta’kidlandi.