МАРКАЗИЙ КУТУБХОНА ФАОЛИЯТИ ВА ҚОНУН ИЖРОСИ ЎРГАНИЛДИ
Халқ депутатлари Янгиқўрғон тумани Кенгаши депутати Юлдашев Турсунпўлат Ҳакимбекович томонидан Янгиқўрғон тумани марказий кутубхонасида Ўзбекистон Республикасининг «Ахборот-кутубхона фаолияти тўғрисида»ги Қонуни ижроси ҳамда муассаса фаолияти юзасидан ўрганиш ўтказилди.
Ўрганиш жараёнида кутубхонада аҳолига кўрсатилаётган ахборот-кутубхона хизматларининг сифати, китоб фондини сақлаш ва бойитиб бориш ҳолати, янги адабиётларни қабул қилиш ҳамда китобхонларга етказиш тизими, электрон каталог ва рақамли ахборот ресурсларидан фойдаланиш имкониятлари атрофлича таҳлил қилинди.
Шунингдек, китобхонлар учун яратилган шарт-шароитлар, ўқув залларининг ҳолати, зарур техник воситалар ва интернет тармоғи билан таъминланганлик даражаси, ногиронлиги бўлган шахсларга қулай муҳит яратилганлиги ҳамда кутубхона ходимларининг касбий малакасини ошириш масалаларига алоҳида эътибор қаратилди.
Қонун талабларидан келиб чиқиб, фуқароларнинг ахборот ва кутубхона ресурсларидан эркин фойдаланиш ҳуқуқини таъминлаш, миллий ҳамда жаҳон адабий меросини кенг тарғиб қилиш, китоб фондини замонавий илмий, бадиий ва ўқув адабиётлари билан мунтазам бойитиш бўйича олиб борилаётган ишлар кўриб чиқилди.
Айниқса, ёшлар ўртасида китобхонлик маданиятини юксалтириш, уларни бўш вақтларини мазмунли ташкил этиш, мутолаага қизиқишини ошириш, таълим муассасалари ва маҳаллалар билан ҳамкорликда китоб тақдимотлари, маънавий-маърифий учрашувлар, ижодий кечалар ҳамда китобхонлик танловларини ташкил этиш масалалари муҳокама қилинди.
Ўрганиш давомида кутубхонага ташриф буюрувчилар сони, доимий китобхонлар қамрови, уларнинг китоб ва ахборот ресурсларига бўлган эҳтиёжи, келиб тушаётган таклиф ҳамда мурожаатлар билан ишлаш тартиби ҳам таҳлил этилди. Аҳолининг турли қатламлари, хусусан, ёшлар, хотин-қизлар, нуронийлар ва имконияти чекланган фуқаролар учун манзилли хизматларни кенгайтириш зарурлиги таъкидланди.
Якунланишида кутубхона фаолияти самарадорлигини янада ошириш, китоб фондини янги адабиётлар билан бойитиш, электрон хизматларни кенг жорий этиш, аҳолини китобхонликка жалб қилиш бўйича тарғибот тадбирларини кучайтириш ҳамда аниқланган масалаларни босқичма-босқич бартараф этиш юзасидан тегишли тавсиялар берилди