O‘zbekiston Respublikasi Prezidentining PQ–406-son qarori hamda Oliy Majlis Senati Kengashining KQ–35-V-son qarori ijrosini ta’minlash, shuningdek, mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya asosida hududlarda deputatlik o‘rganishlari izchil davom ettirilmoqda.

Bugun 16-Ipak yo‘li saylov okrugi deputati, Ijtimoiy soha, yoshlar siyosati, madaniyat va sport masalalari bo‘yicha doimiy komissiya raisi A.Mahkamov, kotibiyat mudiri A.Ermatov hamda deputatga biriktirilgan kotibiyat bosh mutaxassisi Z.Yakubova bilan birgalikda hududdagi mavjud muammolar, aholi murojaatlari va ijtimoiy masalalarni joyiga chiqqan holda o‘rgandilar.

O‘rganishlar davomida saylov okrugi hududidagi deputatga biriktirilgan shahar Maktabgacha va maktab ta’limi bo‘limi tasarrufidagi 21-umumiy o‘rta ta’lim maktabida 2026-yil “Ochiq budjet” dasturining birinchi mavsumida g‘olib bo‘lgan loyiha doirasida amalga oshirilayotgan ishlar ko‘zdan kechirildi.

Xususan, maktab binosini mukammal ta’mirlash, qurilish va rekonstruksiya ishlarining borishi, bajarilayotgan ishlarning sifati hamda ajratilgan mablag‘larning maqsadli sarflanishi yuzasidan o‘rganish olib borildi.

Shu bilan birga, deputatlik nazorati doirasida navbatdagi sessiya kun tartibiga kiritilgan jamoatchilik fikri asosida shakllantirilgan tadbirlarni tanlab olish hamda Jamg‘armadan mazkur tadbirlarga mablag‘ ajratish masalasi bilan bog‘liq jihatlarga ham e’tibor qaratildi. Xususan, ushbu yo‘nalishda 16-Ipak yo‘li saylov okrugi hududiga daxldor masalalar, aholining ehtiyoj va takliflari, ajratiladigan mablag‘larning manzilliligi hamda ularning jamoatchilik manfaatlariga xizmat qilishi nuqtayi nazaridan tegishli holatlar o‘rganildi.

“ Ochiq budjet”da aholining ovozi bilan g‘olib bo‘lgan har bir loyiha ortida xalq ishonchi turadi. Shu bois ajratilgan mablag‘larning belgilangan maqsadlarda sarflanishi, ishlarning sifatli va o‘z vaqtida bajarilishi deputatlik nazoratining muhim yo‘nalishlaridan biridir.