#_deputat_faoliyati
#_24_ta_masala #_Yoshlar_maslahat_guruhi
Aholi salomatligi — deputat nazoratida

Xalq deputatlari Sariosiyo tumani Kengashining “20-So‘fiyon” saylov okrugidan saylangan deputat T.Mirzaev, tuman Kengashi kotibiyati bosh mutaxassisi N.Xamdamova hamda tuman Kengashi huzuridagi “Yoshlar maslahat guruhi” rahbari D.Sattorovlar tomonidan “Shirin” mahallasida aholiga ko‘rsatilayotgan tibbiy xizmatlar sifatini o‘rganish va mavjud muammolarni aniqlash maqsadida o‘rganish tadbiri o‘tkazildi.
O‘rganish jarayonida xalq deputatlari Sariosiyo tumani Kengashining 2026 yilga mo‘ljallangan ish rejasining 7–13-bandlari ijrosini ta’minlash maqsadida hududdagi 64-sonli oilaviy poliklinika faoliyati atroflicha tahlil qilindi. Jumladan, aholiga birlamchi tibbiy-sanitariya yordamini ko‘rsatish holati, tibbiy xizmatlarning sifati va aholi uchun qulayligi, profilaktik tadbirlarning tashkil etilishi hamda tibbiyot muassasasining moddiy-texnik bazasidan samarali foydalanish masalalariga alohida e’tibor qaratildi.
Muloqotlar davomida poliklinika xodimlarining ish faoliyati, aholi murojaatlari va ularni qiynayotgan masalalar ham o‘rganildi. Aniqlangan muammolarni bartaraf etish, tibbiy xizmat ko‘rsatish samaradorligini oshirish va aholiga sifatli tibbiy yordam ko‘rsatish bo‘yicha mas’ullarga tegishli tavsiya va takliflar bildirildi.

Shuningdek, oilaviy poliklinika xodimlari tomonidan patronaj xizmatini sifatli tashkil etish uchun zarur bo‘lgan patronaj sumkalarini yetkazib berish, muassasada mavjud ultratovush tekshiruvi (UZI) apparatidan samarali foydalanishni yo‘lga qo‘yish hamda mazkur uskunada ishlash uchun tuman Tibbiyot birlashmasi tomonidan malakali xodim ajratish masalalari bo‘yicha takliflar bildirildi.
Bildirilgan takliflarning ijobiy yechimini ta’minlash maqsadida mutasaddi tashkilotlar bilan hamkorlikda ish olib borish, aniqlangan kamchiliklarni bartaraf etish va belgilangan vazifalar ijrosini nazoratga olish bo‘yicha kelishuvlarga erishildi.

Deputatlik nazorati doirasida bunday o‘rganishlarning muntazam tashkil etilishi hududda tibbiy xizmatlar sifatini oshirish, aholi murojaatlariga o‘z vaqtida yechim topish, mavjud muammolarni tizimli bartaraf etish hamda fuqarolar salomatligini muhofaza qilishga xizmat qiladi.

Aholi salomatligi — yuksak qadriyat. Shu bois tibbiy xizmatlar sifati va aholi manfaatlarini ta’minlash masalalari deputatlik nazoratining muhim yo‘nalishlaridan biri sifatida doimiy e’tiborda bo‘ladi.