#Deputatlik_nazorati #24_ta_tavsiyaviy_savol #Deputat_daftari #poytaxtdeputatlari #deputatlik_faoliyati

❗️TA’LIMGA E’TIBOR — KELAJAKKA E’TIBOR: DEPUTAT SAYLOV OKRUGIDAGI TA’LIM MUASSASALARI FAOLIYATI BILAN TANISHDI

🏛 Xalq deputatlari Toshkent shahar Kengashi deputati Jamila Shermuhammedova o‘zi saylangan hududdagi “Ko‘tarma” mahallasida bo‘lib, mahalla raisi va “mahalla yettiligi” bilan birgalikda ta’lim va tarbiya muassasalarida yaratilgan sharoitlarni o‘rgandi. Tashrif doirasida 322-sonli maktabgacha ta’lim tashkiloti hamda 181-sonli umumta’lim maktabi faoliyatiga alohida e’tibor qaratildi.

📝 Dastlab deputat “Ko‘tarma” MFY hududida joylashgan, ijtimoiy jihatdan alohida e’tibor va parvarishga muhtoj bolalar tarbiyalanayotgan 322-sonli maktabgacha ta’lim tashkilotining ta’mirdan keyingi faoliyati bilan tanishdi. Jamila Shermuhammedova mazkur muassasada olib borilgan ta’mirlash jarayonlarini avval ham bevosita o‘rganib borgan bo‘lib, bu gal bajarilgan ishlarning natijasi va bolajonlar uchun yaratilgan yangi sharoitlarni ko‘zdan kechirdi.

🔺 Ayni paytda mazkur muassasada 68 nafar bola tarbiya va davolash jarayonlariga jalb etilgan. Yangilangan sharoitlar tarbiyalanuvchilar uchun yanada qulay muhit yaratgani qayd etildi. Muassasa rahbari hamda ota-onalar amalga oshirilgan ishlardan mamnun ekanini bildirib, deputat Jamila Shermuhammedovaga minnatdorlik izhor etdilar.

📉 Bog‘chaning ta’mirdan chiqarilib, bolajonlar uchun chiroyli va qulay sharoitlar yaratilgani O‘zbekiston davlat mustaqilligining 35 yilligi arafasidagi o‘ziga xos bayram tuhfasiga aylandi. Deputat tarbiyachilar va bolajonlarni bayram bilan samimiy muborakbod etdi.

🔔 Shundan so‘ng Jamila Shermuhammedova mahalla raisi va “mahalla yettiligi” bilan birgalikda “Ko‘tarma” mahallasidagi 181-sonli umumta’lim maktabida o‘tkazilgan “Birinchi qo‘ng‘iroq” tadbirida ishtirok etdi. Deputat maktab jamoasi, ustozlar va o‘quvchilarga Prezidentning yangi o‘quv yili munosabati bilan yo‘llagan tabrigini yetkazdi.

📚 Tadbir davomida deputat sinfxonalarga kirib, o‘quvchilar bilan samimiy muloqot qildi. Ayniqsa, maktab ostonasiga ilk bor qadam qo‘ygan birinchi sinf o‘quvchilarining kelajak haqidagi orzu va maqsadlari katta taassurot qoldirdi. Bolajonlar kelajakda shifokor, dizayner, olima bo‘lish, Vatanga sadoqat bilan xizmat qilish kabi ezgu niyatlarini bildirdilar.

🎓 11-sinf o‘quvchilari bilan muloqotda esa ularning kelajak kasbiga oid aniq maqsadlari haqida suhbatlashildi. Yoshlar IT va startap yo‘nalishlari, matematika, kimyo, yadro fizikasi, menejment va marketing kabi zamonaviy sohalarda mutaxassis bo‘lish istagini bildirdilar. Deputat yoshlarning bugundanoq o‘z oldiga aniq maqsad qo‘yib, zamonaviy bilim va kasblarni egallashga intilayotganini alohida e’tirof etdi.

💡 Jamila Shermuhammedova yosh avlodning ta’lim-tarbiyasi va kelajagiga munosib zamin yaratishda ustozlar hamda ota-onalarning mehnati katta ahamiyatga ega ekanini qayd etib, ularga minnatdorlik bildirdi.

📋 Mazkur o‘rganishlar mahalliy Kengash deputati faoliyatining muhim yo‘nalishlari — bolalar va yoshlar uchun yaratilgan sharoitlarni yaxshilash, ta’lim muassasalari faoliyatini bevosita joyiga chiqib o‘rganish, ijtimoiy himoyaga muhtoj bolalarga e’tiborni kuchaytirish hamda yoshlarning bilim va salohiyatini ro‘yobga chiqarishga ko‘maklashish bilan hamohangdir.

🤝 Deputat Jamila Shermuhammedova o‘z saylov okrugidagi ta’lim va ijtimoiy soha obyektlari faoliyatini o‘rganish, bolalar uchun munosib sharoitlar yaratilishiga ko‘maklashish hamda yosh avlodning ta’lim-tarbiyasi bilan bog‘liq masalalarni deputatlik e’tiborida tutish ishlarini izchil davom ettirmoqda.

📱 Telegram 📱 Instagram 📱 Facebook 📱 YouTube 🔎 E-kengash