#deputat_axboroti #poytaxtdeputatlari #deputatlik_faoliyati

❗️XALQ DEPUTATLARI TOSHKENT SHAHAR KENGASHI DEPUTATI ULUG‘BEK ZIYODULLAYEV 2026-YILNING IKKINCHI CHORAGI BO‘YICHA SAYLOVCHILARGA AXBOROT BERDI

🏛 Xalq deputatlari Toshkent shahar Kengashining 22-“Bog‘obod” saylov okrugidan saylangan deputati Ulug‘bek Ziyodullayev saylovchilar bilan navbatdagi uchrashuv o‘tkazib, 2026-yilning ikkinchi choragi davomida amalga oshirilgan ishlar, hududlarda olib borilgan o‘rganishlar, ilgari surilgan tashabbuslar hamda fuqarolar murojaatlari yuzasidan ko‘rilgan choralar haqida axborot berdi.

🤝 Uchrashuvda Uchtepa tumani hokimligi mas’ul xodimlari, tuman Kengashi vakillari, mahalla fuqarolar yig‘inlari raislari, mahalla faollari va hudud jamoatchiligi vakillari ishtirok etdi.

📝 Axborotda ta’kidlanganidek, deputat chorak davomida Xalq deputatlari Toshkent shahar Kengashining 3 ta sessiyasida, shuningdek mahalliy budjet, tadbirkorlikni rivojlantirish va iqtisodiy islohotlar yo‘nalishidagi doimiy komissiyalar faoliyatida ishtirok etib, hududlarni kompleks rivojlantirish, budjet mablag‘laridan samarali foydalanish, tadbirkorlikni qo‘llab-quvvatlash va aholi manfaatlariga daxldor masalalar yuzasidan takliflar ilgari surdi.

📍 Saylov okrugidagi mahallalarda fuqarolar muammolarini joyiga chiqib o‘rganish deputat faoliyatining asosiy yo‘nalishlaridan biri bo‘ldi. Jumladan, “Davlatobod” mahallasidagi Farhod ko‘chasi 27a-uy atrofida noqonuniy tuproq to‘kish va yo‘l ochish holati o‘rganilib, qonuniylikni ta’minlash hamda fuqarolar manfaatlarini himoya qilish maqsadida Uchtepa tumani hokimi nomiga deputatlik so‘rovi yuborildi.

🔺 Shuningdek, “Chamanzor” mahallasida hudud infratuzilmasi, obodonlashtirish va aholi uchun qulay sharoitlarni yaxshilashga oid masalalar o‘rganildi. “Oq Masjid” mahallasida esa mahalla faollari va nuroniylar bilan uchrashuvlar davomida hududdagi ijtimoiy va ma’naviy muhit, fuqarolarni qiynayotgan masalalar hamda ularni tegishli tashkilotlar bilan hamkorlikda hal etish yo‘llari muhokama qilindi.

📨 Hisobot davrida fuqarolar bilan bevosita muloqotga alohida e’tibor qaratilib, jami 24 marotaba fuqarolar qabuli o‘tkazildi. Murojaatlarning asosiy qismi uy-joy kommunal xo‘jaligi, ijtimoiy masalalar, infratuzilma, obodonlashtirish va hududlarda mavjud muammolarni bartaraf etishga oid bo‘ldi.

🔎 Fuqarolar tomonidan ko‘tarilgan ayrim masalalar joyida muhokama qilinib, qo‘shimcha o‘rganishni talab etgan murojaatlar tegishli davlat organlari va tashkilotlariga yuborildi. Ularning ijrosi deputatlik nazoratiga olindi.

📋 Shuningdek, deputatlik faoliyatida ochiqlikni ta’minlash maqsadida amalga oshirilgan ishlar, o‘rganishlar va hududlardagi muammolar yuzasidan ko‘rilgan choralar haqida ijtimoiy tarmoqlar orqali muntazam axborot berib borilgani qayd etildi.

✅ Uchrashuv yakunida Ulug‘bek Ziyodullayev Davlatobod, Chamanzor, Oq Masjid hamda 22-“Bog‘obod” saylov okrugidagi boshqa mahallalarda aholi bilan ochiq muloqotni davom ettirish, fuqarolar murojaatlarini manzilli o‘rganish, infratuzilma va obodonlashtirish bilan bog‘liq muammolarni mas’ul tashkilotlar bilan hamkorlikda hal etish hamda ularning ijrosi ustidan deputatlik nazoratini kuchaytirish ustuvor vazifa bo‘lib qolishini ta’kidladi.

📱 Telegram 📱 Instagram 📱 Facebook 📱 YouTube 🔎 E-kengash