Mahallalarda aholi bilan ochiq va samarali muloqotni yo‘lga qo‘yish, fuqarolarni qiynayotgan masalalarni o‘z vaqtida aniqlash, ularning qonuniy yechimini ta’minlash hamda mahalla faoliyatini yanada takomillashtirish borasidagi ishlar mahalliy Kengash deputatlari tomonidan tizimli ravishda nazorat-tahlil qilib borilmoqda.

Xalq deputatlari Termiz shahar Kengashi raisi, deputat D.Normuradova, Kengashning 12-“Saxovat” saylov okrugi deputati X.Jurayev hamda kotibiyat bosh mutaxassisi R.Mamashukurovlar “Tinchlik” mahallasida bo‘lib, mahalla faollari bilan yig‘ilish o‘tkazdilar.

Yig‘ilish davomida mahalladagi mavjud holat, mahalla faollarining o‘ziga yuklatilgan vazifalarni bajarishi, aholi bilan ishlash samaradorligi, fuqarolar murojaatlarini o‘rganish hamda hududdagi ijtimoiy-iqtisodiy masalalarni hal etish borasida amalga oshirilayotgan ishlar atroflicha muhokama qilindi.

Mazkur nazorat-tahlil jarayoni mahalliy Kengash deputatlari faoliyati uchun belgilangan “24 ta eng muhim yo‘nalish” mezonlari asosida tashkil etildi. Unda mahalla hududidagi ishlarni tizimli yo‘lga qo‘yish, aholi muammolarini “xonadonbay” o‘rganish, murojaatlarni o‘z vaqtida ko‘rib chiqish va mas’ul tashkilotlar bilan hamkorlikda ularning yechimini ta’minlash masalalariga alohida e’tibor qaratildi.

Dastlab, mahalladagi faoliyat O‘zbekiston Respublikasi Prezidentining 2026-yil 24-iyundagi “Mahalla boshqaruvini samarali tashkil etishga oid qo‘shimcha chora-tadbirlar to‘g‘risida”gi PF–116-son Farmoni talablari asosida tahlil qilindi. Farmonda belgilangan vazifalarning joylarda ijrosini ta’minlash, mahalla institutining aholi muammolarini hal etishdagi rolini kuchaytirish va mahalla faollarining mas’uliyatini oshirish masalalari yuzasidan fikr almashildi.

Suhbat davomida mahalla raisi va faollarining aholi bilan ishlash amaliyoti, murojaatlarni ko‘rib chiqish holati, ijtimoiy himoyaga muhtoj oilalarni qo‘llab-quvvatlash, bandlikni ta’minlash, yoshlar va xotin-qizlar bilan ishlash, hududda obodonlashtirish hamda mavjud muammolarni tegishli tashkilotlar bilan hamkorlikda bartaraf etish borasidagi faoliyatiga e’tibor qaratildi.

Shuningdek, mahalla faollari tomonidan hududda uchrayotgan ayrim muammolar, aholi tomonidan bildirilayotgan taklif va murojaatlar yuzasidan ma’lumotlar berilib, ularni hal etish bo‘yicha tegishli fikr va takliflar bildirildi. Aniqlangan masalalarni tegishli mutasaddi tashkilotlarga yo‘naltirish, ijrosini nazoratga olish va natijasi bo‘yicha aholini xabardor qilish muhim vazifa ekani ta’kidlandi.

Yakunda mahalla faoliyatini yanada takomillashtirish, belgilangan vazifalar ijrosini ta’minlash, aniqlangan kamchiliklarni bartaraf etish hamda aholi murojaatlari bilan ishlash samaradorligini oshirish yuzasidan tegishli tavsiya va topshiriqlar berildi.