Sh. Norsayev tashabbusi bilan mahallada keng ko‘lamli ekologik obodonlashtirish aksiyasi o‘tkazildi

Xalq deputatlari Termiz tuman Kengashi deputati, Termiz tuman Ekologik partiyasi Kengashi raisi hamda Agrar, suv xo‘jaligi va ekologiya masalalari bo‘yicha doimiy komissiya raisi Sh. Norsayev tashabbusi bilan “BIO-TEXNO-EKO” MChJ hamkorligida mahalla hududida keng ko‘lamli ekologik obodonlashtirish ishlari amalga oshirildi.

Tadbir doirasida mahalla ko‘chalarini ko‘kalamzorlashtirish, daraxtlarni parvarishlash, maishiy chiqindilarni yig‘ishtirish, ariq-zovurlarni tozalash, ichki yo‘llar hamda jamoat joylarini obodonlashtirish ishlari olib borildi.

Aksiyada 85 ta xonadondan 82 nafar xonadon egalari faol ishtirok etdi. Ertalab boshlangan hashar davomida 70 dan ortiq xonadonning ko‘cha tomoni yantoq, sho‘ra va boshqa begona o‘tlardan tozalandi. Uylarning devor va deraza qismlari o‘rgimchak uyalaridan tozalanib, obodonlashtirildi.

Shuningdek, uylar orqa qismiga ekilgan 111 tup daraxtning tagi oqlandi, 35 tup daraxt agrotexnik ishlovdan o‘tkazildi. Yo‘laklar va ko‘chalar supurilib, tartibga keltirildi.

Hashar davomida yig‘ilgan qariyb 2,5 tonna maishiy chiqindi “BIO-TEXNO-EKO” MChJ xodimlari tomonidan maxsus texnika yordamida olib chiqib ketildi.

Mazkur ekologik aksiya mahalla hududida tozalikni ta'minlash, ekologik madaniyatni yuksaltirish, fuqarolarning atrof-muhitni asrash borasidagi mas'uliyatini oshirish hamda sog‘lom va obod yashash muhitini yaratishga xizmat qildi.

📖 Huquqiy asos

Mazkur tadbir Oʻzbekiston Respublikasining “Ekologik nazorat toʻgʻrisida”gi Qonuni talablariga hamohang tarzda amalga oshirildi. Ushbu Qonun Qonunchilik palatasi tomonidan 2013-yil 12-noyabrda qabul qilingan hamda Senat tomonidan 2013-yil 12-dekabrda maʼqullangan.

Qonunga muvofiq, atrof-muhitni muhofaza qilish, tabiiy resurslardan oqilona foydalanish, ekologik qonunchilik talablariga rioya etilishi ustidan davlat, idoraviy, ishlab chiqarish va jamoatchilik ekologik nazoratini amalga oshirishning huquqiy asoslari belgilangan. Shuningdek, Qonun ekologik xavfsizlikni ta'minlash, fuqarolarning qulay atrof-muhitga bo‘lgan huquqlarini himoya qilish hamda jamiyatda ekologik madaniyatni yuksaltirishga xizmat qiladi.