Xalq deputatlari Bo‘stonliq tumani Kengashning 2026-yilga mo‘ljallangan ish rejasiga muvofiq Kengash raisi O.Babayev, kotibiyat mudiri J.Sadirov tomonlaridan tumanning “Bo‘ston” mahallasidagi 20-sonli umumta’lim maktabi hamda “Markaziy” mahallasidagi 2-sonli umumta’lim maktabiga olib boruvchi ko‘chalarda piyodalar uchun qulay va xavfsiz harakatlanish sharoitlarini yaratish masalasi joyiga chiqqan holda o‘rganildi.

🔻O‘rganish davomida mazkur ko‘chalarning mavjud holati, piyodalar harakati uchun yaratilgan sharoitlar, yo‘l chetlarining obodonlashtirilganlik darajasi hamda o‘quvchilarning maktabga qatnashida yuzaga kelayotgan noqulayliklar ko‘zdan kechirildi. Ayniqsa, ertalab va darslar tugagan vaqtda o‘quvchilar harakati keskin ko‘payishi, ayrim hududlarda piyodalar uchun maxsus yo‘laklar mavjud emasligi yoki mavjud yo‘laklarning talab darajasida emasligi yo‘l harakati xavfsizligi nuqtai nazaridan dolzarb masala ekani ta’kidlandi.

🔻Deputatlar tomonidan maktablarga olib boruvchi asosiy yo‘nalishlarda piyodalar yo‘laklarini barpo etish, ularni zamonaviy talablar asosida jihozlash, zarur joylarda yo‘l belgilari va piyodalar o‘tish joylarini tashkil etish bo‘yicha takliflar bildirildi. Shuningdek, piyodalar yo‘laklarini qurishda maktab o‘quvchilarining xavfsizligi, nogironligi bo‘lgan shaxslar va boshqa fuqarolar uchun qulaylik yaratish, yo‘laklarning uzluksizligini ta’minlash hamda ularni tungi vaqtda yoritish masalalariga alohida e’tibor qaratish zarurligi qayd etildi.

🔻O‘rganish yakunida mavjud muammolarni bartaraf etish maqsadida piyodalar yo‘laklarini qurish bo‘yicha zarur chora-tadbirlarni belgilash bo‘yicha tuman hokimligi mas’ullariga murojaat qilinishi belgilab olindi.