Xalq deputatlari Sardoba tumani Kengashi kotibiyati bosh mutaxassisi L.Toshquvvatov hamda tuman Kengashi deputatlari B.Bekmurodovlar tomonidan Yangiqishloq mahallasi hududida yaqinda qurilgan beton latoklar va sug‘orish tizimining holati joyiga chiqqan holda o‘rganildi.
O‘rganish davomida sug‘orish infratuzilmasining samaradorligi, beton latoklarning qurilish sifati, suvning belgilangan yo‘nalish bo‘yicha yetkazib berilishi hamda inshootlarning texnik holati tahlil qilindi. Shu bilan birga, amalga oshirilgan ishlar aholi va fermer xo‘jaliklari ehtiyojlariga qay darajada javob berayotgani ham o‘rganildi.
Tahlillar jarayonida ayrim uchastkalarda beton latoklarning sifati va texnik holati yuzasidan e’tirozli holatlar mavjudligi qayd etildi.
Xususan, ba’zi joylarda qurilish ishlarini yana-da takomillashtirish, suv oqimining uzluksizligini ta’minlash hamda latoklar atrofini obodonlashtirish ishlarini kuchaytirish zarurligi ta’kidlandi.
Shuningdek, inshootlardan samarali foydalanish va ularni doimiy texnik nazoratdan o‘tkazib borish bo‘yicha mas’ullarga tegishli tavsiyalar berildi.
O‘rganish yakunida aniqlangan kamchiliklarni qisqa muddatlarda bartaraf etish, sug‘orish tizimining samaradorligini oshirish va qurilgan inshootlarning sifatini ta’minlash yuzasidan mas’ul tashkilotlar oldiga aniq vazifalar qo‘yildi.
Mazkur masala deputatlik nazoratiga olinib, belgilangan topshiriqlar ijrosi bo‘yicha monitoring ishlari davom ettirilishi ma’lum qilindi.