Маълумки, Вазирлар Маҳкамасининг
2025 йил 21 июлдаги 453-сон қарори билан иқтисодиёт тармоқлари, ижтимоий соҳа
объектлари ҳамда кўп квартирали уй-жой фондини куз-қиш мавсумида барқарор
ишлашга тайёрлаш бўйича аниқ вазифалар белгилаб берилган. 

Мазкур қарор ижросини таъминлаш,
мавсумга тайёргарлик ишлари самарадорлигини ошириш ва жойлардаги ҳолатни
ўрганиш мақсадида Халқ депутатлари вилоят Кенгаши томонидан Медиа режа
тасдиқланган. Ушбу режа доирасида депутатлар томонидан ҳудудлардаги ижтимоий
соҳа объектларида амалга оширилаётган ишлар юзасидан назорат-таҳлил тадбирлари
ўтказилмоқда. 

Хусусан, 35-Сурхон сайлов округидан
Халқ депутатлари вилоят Кенгаши депутати Кесимов Даврон Бобомуродович Косон
туманидаги умумтаълим мактабларида бўлиб, куз-қиш мавсумига тайёргарлик
ҳолатини ўрганди. Ўрганишлар давомида депутат таълим муассасаларини иссиқлик ва
электр энергияси билан узлуксиз таъминлаш, муҳандислик коммуникацияларини соз
ҳолатда сақлаш ҳамда хавфсизлик талабларига риоя этиш масалаларига алоҳида
эътибор қаратди. 

Жумладан, тумандаги 74-умумтаълим
мактабида олиб борилган назорат-таҳлил жараёнида таълим муассасасининг иссиқлик
тизими, энергия таъминоти ва бинонинг умумий ҳолати кўздан кечирилди. Шунингдек,
ўқувчи ва педагоглар учун қулай муҳит яратиш бўйича амалга оширилаётган ишлар
билан танишилди. 

Қайд этиш лозимки, Косон туманидаги
мавжуд 102 та умумтаълим мактабида куз-қиш мавсумига тайёргарлик ишлари тизимли
асосда ташкил этилмоқда. Таълим муассасаларида иссиқлик тизимлари янгиланиб,
энергия таъминоти барқарор ҳолатга келтирилган ҳамда зарур ёқилғи захираси
шакллантирилган. 

Бундан ташқари, ўқув биноларидаги
синфхоналар, лабораториялар ва ёрдамчи хонадонлар қишки шароитга мос равишда
тайёрланмоқда. Бу ишлар натижасида ўқувчилар учун қулай ва хавфсиз муҳит
яратилиб, таълим жараёнининг узлуксизлигини таъминлашга қаратилган мақсадли
ишлар амалга оширилмоқда. Албатта,
умумтаълим
муассасаларининг қишки мавсумга тўлиқ тайёрлиги таълим сифатига ҳам ижобий
таъсир этиб, болалар саломатлиги ва хавфсизлигини таъминлашда муҳим омил
ҳисобланади. Бу
борадаги назорат тадбирлари эса мавсумий муаммоларни олдиндан аниқлаб, уларни
бартараф этиш имконини беради.