Boyovut tumanida Kengash ish rejasiga muvofiq “Deputat bilan bir kun” loyihasi doirasida Xalq deputatlari Boyovut tumani Kengashi 2-Ijodkor saylov okrugi deputati Alibek Amanlikov bir qator uchrashuv va tadbirlarda ishtirok etdi.

⏩ Dastlab deputat "Ma’naviyat" mahallasida olib borilayotgan kanalizatsiya tarmog‘ini yangilash va ta’mirlash ishlarini o‘rganib chiqdi. Deputat qurilish jarayonini joyida ko‘zdan kechirib, mas’ullarga ishlarni sifatli va belgilangan muddatda yakunlash bo‘yicha tegishli tavsiyalar berdi hamda deputatlik nazoratini o‘rnatdi.

⏩ Shundan so‘ng, deputat "Sohil" mahalla fuqarolar yig‘inida joriy yilning 18-oktabr kuni O‘zbekiston “Nuroniylar” jamg‘armasi Respublika boshqaruvi raisi boshchiligida o‘tkazilgan yig‘ilish ijrosini ta’minlash yuzasidan tashkil etilgan davra suhbatida ishtirok etdi. Tadbirda oilalarda ajrimlarning oldini olish, erta va qarindoshlar o‘rtasidagi nikohlarning salbiy oqibatlari, shuningdek shariat nikohlarini rasmiylashtirish masalalari muhokama qilindi. Mazkur tadbirda deputat Alibek Amanlikov hamda tuman “Nuroniylar” jamg‘armasi faollari, mahalla yettiligi va keng jamoatchilik vakillari faol ishtirok etishdi.

⏩ Boyovut tumanida o‘tkazilgan “Jismoniy tayyorgarlik darajasi” sport sinovlari tadbirida ham qatnashdi. O‘zbekiston Respublikasi Sport vazirligi hamkorligida tashkil etilgan ushbu sport musobaqasida tuman nuroniylari, mahalla xodimlari va yoshlar o‘z jismoniy salohiyatlarini sinovdan o‘tkazishdi. Tadbir yuqori ruhda o‘tib, sog‘lom turmush tarzini targ‘ib etishga xizmat qildi.