Xalq deputatlari Boyovut tumani Kengashi deputati Nazokat Narxadjayeva "Yangiobod" mahallasida olib borilayotgan ishlar, fuqarolarning muammolari hamda dolzarb masalalar bilan tanishish maqsadida navbatdagi uchrashuvni o‘tkazdi.

Uchrashuv davomida deputat avvalo mahalla yettiligi — mahalla raisi, profilaktika inspektori, yoshlar yetakchisi, xotin-qizlar faoli, nuroniylar, maslahatchilar va boshqa mas’ullar bilan suhbat o‘tkazdi. Mahalladagi ijtimoiy-iqtisodiy holat, aholi bandligini ta’minlash, yoshlar bilan ishlash, mahallaning obodonlashtirish ishlari kabi masalalar muhokama qilindi.

Shundan so‘ng deputat murojaat bilan kelgan xotin-qizlar bilan alohida uchrashuv o‘tkazdi. Uchrashuv davomida ayollar tomonidan ishga joylashish, tadbirkorlikni yo‘lga qo‘yish, ijtimoiy yordam olish va yashash sharoitlarini yaxshilashga oid masalalar ko‘tarildi. Har bir murojaat diqqat bilan tinglanib, ularni hal etish bo‘yicha tegishli tashkilotlarga topshiriqlar berildi.

Deputat ta’kidlaganidek, fuqarolarning, ayniqsa xotin-qizlarning muammolarini joyida o‘rganish va ularni amalda yechish — deputatlik faoliyatining muhim yo‘nalishlaridan biridir.