Bugungi kun yoshlari – ertangi kun jamiyatining poydevori, desak mubolag‘a bo‘lmaydi. Ularning har tomonlama yetuk, bilimli va sog‘lom bo‘lib voyaga yetishi esa, jamiyat va davlatimizning eng muhim vazifalaridan biri hisoblanadi. Shu maqsadda, Xalq deputatlari Payariq tumani Kengashi deputati Fotima Dexqonova Ahmat Yassaviy mahallasida joylashgan 79-umumta’lim maktabida bo‘lib, yuqori sinf o‘quvchilari bilan ochiq muloqot o‘tkazdi.

Uchrashuv davomida deputat o‘quvchilarning fanlarni o‘zlashtirishi, sport va fan yo‘nalishidagi to‘garaklarga faol qatnashishi, bo‘sh vaqtlarini samarali tashkil etish borasidagi fikr va mulohazalarni tingladi. Shuningdek, yoshlarning orzu-intilishlari, kelajakdagi rejalari, kasb tanlashdagi yondashuvlari haqida ochiq suhbat bo‘ldi.

F. Dexqonova o‘z chiqishida har bir o‘quvchini zamonaviy bilim va ko‘nikmalarni egallashga, sport bilan shug‘ullanish orqali sog‘lom turmush tarzini shakllantirishga, to‘garaklarda faol ishtirok etish orqali iqtidorini yuzaga chiqarishga undadi. "Bugungi kichik yutuqlaringiz — ertangi katta zafarlaringizning poydevoridir", — deya ta’kidladi u.

Muloqot so‘ngida o‘quvchilar o‘zlarini qiziqtirgan savollar bilan murojaat qildilar, fikr-mulohazalarini bayon etdilar. Deputat esa ularning har bir savoliga e’tibor bilan yondashib, samimiy va hayotiy javoblar berdi.