Xalıq deputatları Bozataw rayonlıq Keńesi deputatlarınıń zamanagóy sanlı texnologiyalardan paydalanıw kónlikpelerin jetilistiriw, deputatlıq xızmetti jáne de nátiyjeli hám ashıqlıq principleri tiykarında alıp barıw maqsetinde E-Keńes elektron platformasın úyreniw boyınsha seminar ótkerildi.
Seminarda deputatlarǵa E-Keńes platformasınıń maqseti, tiykarǵı funkciyaları hám múmkinshilikleri, onnan deputatlıq xızmet dawamında nátiyjeli paydalanıw jolları haqqında keń túrde maǵlıwmat berildi.
Sonday-aq, platforma arqalı deputatlıq xızmetke tiyisli maǵlıwmatlardı elektron túrde alıw, hújjetler menen islew, kerekli maǵlıwmatlardı izlew hám deputattıń xızmetine baylanıslı máselelerdi sanlı platforma arqalı baqlap barıw boyınsha ámeliy kórsetpeler berildi.
Seminar dawamında deputatlar E-Keńes platformasında ámeliy túrde islewdi úyrenip, paydalanıw barısında júzege keliwi múmkin bolǵan máseleler boyınsha ózlerin qızıqtırǵan sorawlarına juwaplar aldı.
E-Keńes platformasınan nátiyjeli paydalanıw deputatlardıń xızmetin sanlastırıw, maǵlıwmat almasıwdı tezletiw, jumıstı sistemalastırıw hám puqaralar menen islewde nátiyjelilikti arttırıwǵa múmkinshilik beredi.
Bunday oqıw-seminarlar deputatlardıń sanlı sawatlılıǵın arttırıw menen birge, Xalıq deputatları Keńesiniń jumısın zaman talabına say jetilistiriwge xızmet etedi.