Xalq deputatlari Chilonzor tumani Kengashi deputati Xidiyatullina Rima Rashitovna tomonidan saylovchilar bilan o‘tkazilgan uchrashuvlar davomida fuqarolar tomonidan ko‘tarilgan masalalar asosida maktabgacha ta’lim tizimiga oid muammolar yuzasidan deputat so‘rovi yuborilgan edi.

Mazkur deputat so‘rovida O‘zbekiston Respublikasi Vazirlar Mahkamasining 2018-yil 28-martdagi 244-son qarori bilan tasdiqlangan “Bolalarni davlat maktabgacha ta’lim tashkilotlariga qabul qilish bo‘yicha davlat xizmatlari ko‘rsatishning ma’muriy reglamenti” ijrosi, bolalarni davlat maktabgacha ta’lim tashkilotlariga qabul qilish tartibi, elektron navbat tizimining amaldagi holati, fuqarolar murojaatlarida ko‘tarilayotgan asosiy muammolar hamda ularni bartaraf etish yuzasidan amalga oshirilayotgan chora-tadbirlar bo‘yicha batafsil ma’lumot taqdim etilishi so‘ralgan edi.

Mazkur deputat so‘rovi yuzasidan Chilonzor tumani Maktabgacha va maktab ta’limi bo‘limi tomonidan 2026-yil 6-avgustdagi 01-5/5-1444-sonli rasmiy javob xati taqdim etildi.

Javob xatida qayd etilishicha, bolalarni davlat maktabgacha ta’lim tashkilotlariga qabul qilish, elektron navbatni shakllantirish, bo‘sh o‘rinlar hisobini yuritish va yo‘llanmalar berish jarayonlari Maktabgacha ta’limni boshqarish axborot tizimi orqali avtomatlashtirilgan tartibda amalga oshirilmoqda.

Shuningdek, amaldagi me’yoriy-huquqiy hujjatlarga muvofiq imtiyozli toifadagi bolalarni qabul qilish tartibi, fuqarolarning my.gov.uz portali orqali ariza topshirish va navbat holatini kuzatish imkoniyatlari, shuningdek uzoq vaqt davomida yo‘llanma shakllanmayotgan murojaatlar bo‘yicha olib borilayotgan tahlillar va ko‘rilayotgan choralar haqida ma’lumot berilgan.

Ta’kidlanishicha, uzoq muddat davomida yo‘llanma shakllanmayotgan holatlar bo‘yicha fuqarolar navbatlari qayta o‘rganilib, quvvati yetarli bo‘lmagan hududlarda mavjud imkoniyatlardan kelib chiqib, kam quvvatda faoliyat yuritayotgan maktabgacha ta’lim tashkilotlariga tavsiya etish amaliyoti yo‘lga qo‘yilgan.

Mazkur masala deputatlik nazorati tartibida kuzatib boriladi hamda saylovchilar tomonidan ko‘tarilgan murojaatlar yuzasidan tegishli tashkilotlar bilan hamkorlikda amaliy ishlar davom ettiriladi.