Xalq deputatlari Boyovut tumani Kengashi raisi Obloqul Isanov boshchiligida tuman Kengashi deputatlari Alibek Amanlikov hamda Asqarali Odilov tomonidan tumandagi 40-sonli umumta’lim maktabi hududida amalga oshirilayotgan “Tashabbusli budjet” loyihasining 2025-yil ikkinchi mavsumida g‘olib bo‘lgan loyiha doirasidagi qurilish ishlari ko‘zdan kechirildi.

Mazkur loyiha doirasida maktab hududida sun’iy qoplamali, usti yopiq, zamonaviy sport anjomlari bilan jihozlangan, shuningdek, yuvinish va kiyinish xonalariga ega bo‘lgan mini futbol maydonini barpo etish hamda zarur sport jihozlarini o‘rnatish belgilangan.

Obyekt qurilishiga mas’ul MCHJ tomonidan ma’lum qilinishicha, sport maydoni joriy yilning aprel o‘rtalariga qadar foydalanishga topshirilishi rejalashtirilgan.

Ma’lumot o‘rnida, umumiy qiymati 1 milliard 450 million so‘mni tashkil etuvchi mazkur loyiha 2 623 ta ovoz to‘plab, g‘olib loyihalar qatoridan o‘rin olgan.

Shuningdek, deputatlar tomonidan “Ijodkor” mahallasida olib borilayotgan kanalizatsiya qurilish ishlari ham o‘rganildi.