Kengash qarorlari ijrosi yuzasidan tahliliy yig‘ilish o‘tkazildi

Xalq deputatlari Namangan shahar Kengashi raisi R. Isakov raisligida Kengash tomonidan qabul qilingan qarorlarning ijrosini ta'minlash, ularning bajarilish holatini tahlil qilish hamda nazorat samaradorligini oshirish masalalariga bag‘ishlangan tahliliy yig‘ilish bo‘lib o‘tdi.

Yig‘ilishda Kengash qarorlarining ijro holati, belgilangan vazifalarning bajarilishi, ijro intizomi hamda mavjud muammo va kamchiliklar atroflicha muhokama qilindi. Mas'ul tashkilotlar tomonidan amalga oshirilayotgan ishlar tahlil qilinib, qarorlar ijrosini o‘z vaqtida va sifatli ta'minlash yuzasidan tegishli topshiriqlar berildi.

Shuningdek, kun tartibidagi asosiy masalalardan biri sifatida Namangan shahar Moliya bo‘limining hisoboti eshitildi. Hisobotda mahalliy budjet mablag‘larining maqsadli va samarali sarflanishi, Kengash qarorlarida belgilangan vazifalarning moliyaviy ta'minoti hamda budjet mablag‘laridan foydalanish samaradorligi yuzasidan amalga oshirilgan ishlar to‘g‘risida axborot berildi.

Muhokamalar yakunida Kengash qarorlari ijrosini so‘zsiz ta'minlash, ijro intizomini yanada mustahkamlash, nazorat tadbirlarini tizimli davom ettirish hamda aniqlangan kamchiliklarni bartaraf etish bo‘yicha mas'ul rahbarlarga aniq vazifalar belgilandi.