Aholiga sifatli birlamchi tibbiy xizmat ko‘rsatish, shuningdek, ehtiyojmand fuqarolarni davlat tomonidan kafolatlangan bepul dori vositalari bilan ta’minlash masalalari deputatlik nazoratining muhim yo‘nalishlaridan biridir.

Shu maqsadda Xalq deputatlari Termiz shahar Kengashining 15-“Tuproqqo‘rg‘on” saylov okrugi deputati D.Toshboyeva hamda Kengash kotibiyati bosh mutaxassisi A.Temirov tomonidan okrug hududidagi 3-sonli oilaviy poliklinikada nazorat-tahlil tadbiri o‘tkazildi.

O‘rganish jarayoni Oliy Majlis Senati tomonidan mahalliy Kengash deputatlari faoliyati uchun belgilangan “Eng muhim 24 ta yo‘nalish” mezonlari, xususan, 9-band — “Bepul beriladigan dorilar bilan ta’minlash holati” asosida tashkil etildi.

Nazorat davomida dispanser nazoratidagi bemorlar, keksalar, homilador ayollar va bolalar uchun ajratilgan bepul dori vositalarining mavjudligi, saqlanishi hamda elektron retsept asosida fuqarolarga manzilli yetkazilishi, shuningdek, shifokorlar qabuli va tibbiy xizmat ko‘rsatish sifati ko‘zdan kechirildi.

Deputat D.Toshboyeva ta’kidlaganidek, har bir fuqaroning o‘z vaqtida sifatli tibbiy yordam olishi va belgilangan bepul dori vositalari bilan ta’minlanishi muhim. Shu bois mazkur yo‘nalishdagi ishlar deputatlik nazorati doirasida izchil davom ettiriladi.

O‘rganish yakunida aniqlangan masalalarni bartaraf etish, dori vositalari zaxirasini muntazam yangilab borish hamda aholiga tibbiy xizmat ko‘rsatish sifatini yanada oshirish yuzasidan poliklinika mas’ullariga tegishli tavsiya va ko‘rsatmalar berildi.