Xalq deputatlari Bo‘stonliq tumani Kengashning 2026-yilga mo‘ljallangan ish rejasiga muvofiq O‘zbekiston “Adolat” sotsial-demokratik partiyasidan saylangan deputat M.Ashurov tomonidan tuman hokimi o‘rinbosari A.Rixsitillayev ishtirokida tuman markazida barpo etilayotgan “Bog‘i Eram” istirohat bog‘ining qurilish va obodonlashtirish ishlari o‘rganildi.

🟢O‘rganish davomida obyektda amalga oshirilayotgan ishlar bilan bevosita tanishilib, hududda aholi va mehmonlar uchun zamonaviy, obod va qulay dam olish maskanini yaratish maqsadida bir qator ishlar olib borilayotgani qayd etildi. Xususan, bog‘ hududida favvora va amfiteatrni ta’mirlash ishlari amalga oshirilmoqda. Mazkur obyektlarni ta’mirlash orqali bog‘ning arxitekturaviy ko‘rinishini yanada yaxshilash, aholi uchun madaniy tadbirlar va ommaviy dam olish uchun qulay sharoitlar yaratish ko‘zda tutilgan.

🟢Shuningdek, bog‘ hududida piyodalar yo‘laklariga bruschatkalar yotqizish ishlari olib borilmoqda. Yo‘laklarni sifatli va tekis barpo etish, piyodalarning erkin va xavfsiz harakatlanishi uchun qulay sharoit yaratishga alohida e’tibor qaratilmoqda. Bog‘ning diqqatga sazovor maskanlaridan biri bo‘lgan “Shoirlar alleyasi”ni pardozlash va obodonlashtirish ishlari ham davom etmoqda. Ushbu hududni estetik jihatdan yanada ko‘rkamlashtirish, madaniy-ma’rifiy muhitni boyitish va tashrif buyuruvchilar uchun o‘ziga xos maskan yaratish maqsad qilingan.

🟢Bundan tashqari, bog‘ hududida ko‘kalamzorlashtirish ishlari amalga oshirilib, yashil maydonlarni kengaytirish, hududni obod va ko‘rkam ko‘rinishga keltirish choralari ko‘rilmoqda. Mavjud daraxt va o‘simliklarni asrab-avaylash, yangi yashil hududlarni tashkil etish hamda bog‘ning umumiy landshaft ko‘rinishini yaxshilashga alohida e’tibor qaratilmoqda.

🟢Shuningdek, piyodalar yo‘laklarining sifatli bajarilishi, hududda suv to‘planib qolishining oldini olish, obodonlashtirish ishlarini yakuniga yetkazish, daraxt va ko‘chatlarni parvarishlash hamda aholi xavfsizligini ta’minlash masalalari yuzasidan mas’ullarga tegishli tavsiyalar berildi.