O‘zbekiston Respublikasi Mustaqilligining 35 yilligi — xalqimizning ozod va erkin hayot yo‘lidagi tarixiy tanlovini, milliy g‘urur va iftixorini o‘zida mujassam etgan ulug‘ va qutlug‘ bayramdir.
🌏Mustaqillik bizga, avvalo, o‘z taqdirimizni o‘zimiz belgilash, milliy qadriyatlarimiz, ona tilimiz, tariximiz va boy ma’naviy merosimizni asrab-avaylash hamda kelajak avlod uchun munosib shart-sharoitlar yaratish imkonini berdi. O‘tgan yillar davomida mamlakatimizning siyosiy, iqtisodiy va ijtimoiy hayotida tub o‘zgarishlar amalga oshirilib, xalqimiz farovonligini yuksaltirish yo‘lida keng ko‘lamli bunyodkorlik ishlari olib borildi.
🌏Bugun Yangi O‘zbekiston taraqqiyotining yangi bosqichida inson qadri, xalq manfaatlari va adolat tamoyillari ustuvor ahamiyat kasb etmoqda. Fuqarolarning huquq va manfaatlarini ta’minlash, aholi turmush farovonligini oshirish, ta’lim, tibbiyot, tadbirkorlik va mahallalarni rivojlantirishga qaratilgan islohotlar yurtimizda yangi imkoniyatlar eshigini ochmoqda.
🌏Deputat sifatida men uchun Mustaqillik — shunchaki bayram sanasi emas, balki xalqimiz oldidagi ulkan mas’uliyat va daxldorlik tuyg‘usidir. Saylovchilar ishonchini oqlash, ularning murojaat va muammolarini tinglash, hududimiz ravnaqiga munosib hissa qo‘shish — Vatanga xizmat qilishning eng muhim mezonlaridan biridir.
🌏Zero, mustaqillikni asrash va uning qadriga yetish har birimizning muqaddas burchimizdir. Yurtimiz tinchligi, xalqimiz birdamligi va farzandlarimizning porloq kelajagi yo‘lida hamjihatlik bilan harakat qilsak, Yangi O‘zbekistonning ulkan marralarini albatta zabt etamiz.

🌏Mustaqilligimiz abadiy bo‘lsin! Yurtimiz tinch, osmonimiz musaffo, xalqimiz farovon va kelajagimiz yanada porloq bo‘lsin!

Xalq deputatlari Jondor tumani Kengashi deputati S.Qaxxorov