🇺🇿 MUSTAQILLIK BAYRAMIGA MUNOSIB TUHFA: QUDUQSOYDA YANGI MAKTAB BINOSI FOYDALANISHGA TOPSHIRILDI!

Mustaqilligimizning 35 yillik shukuhi yurtimiz bo‘ylab tobora keng quloch yozayotgan shu kunlarda Bandixon tumanida yana bir quvonchli voqea nishonlandi.

Bandixon tumani Quduqsoy mahallasidagi 33-sonli umumta’lim maktabiga qo‘shimcha 240 o‘rinli, zamonaviy yangi o‘quv binosi foydalanishga topshirildi.

Umumiy qiymati qariyb 3,7 milliard so‘m bo‘lgan yangi bino o‘quvchilar uchun barcha zarur sharoitlarga ega bo‘lib, yosh avlodning sifatli ta’lim olishi uchun munosib imkoniyat yaratadi.

🇺🇿 Quduqsoy mahallasi aholisi uchun 2026-yil chin ma’noda bunyodkorlik va yangilanish yili bo‘lmoqda. Mahallada 11 kilometrdan ortiq ichki yo‘llarning asfaltlangani, endilikda esa maktabning yangi va zamonaviy binosi foydalanishga topshirilgani buning yorqin ifodasidir.

🎉 Yangi bino ochilishiga bag‘ishlangan tadbirda Xalq deputatlari Bandixon tumani Kengashi deputati, tuman hokimi Abdumalik Allamuradov, nuroniylar, jamoatchilik vakillari hamda maktab jamoasi ishtirok etdi.
Tadbirda nuroniylar yurtimizdagi tinchlik-osoyishtalik, xalqimiz farovonligi va mamlakatimiz ravnaqi uchun ezgu duolar qildilar. Davlatimiz rahbari tomonidan chekka hududlarga, xususan, ta’lim maskanlariga qaratilayotgan yuksak e’tibor uchun o‘z minnatdorchiliklarini bildirdilar.

“Albatta, ushbu ezgu ishlar farzandlarimizning sifatli ta’lim olishlari va kelajakda mamlakatimiz farovonligi yo‘lida munosib kadr bo‘lib yetishishlari uchun xizmat qiladi”, — deydi tuman hokimi Abdumalik Allamuradov.

Bugun Quduqsoyda bunyod etilgan ushbu zamonaviy ta’lim maskani yuzlab o‘g‘il-qizlarning orzu-maqsadlari sari dadil qadam tashlashiga xizmat qiladi.

🇺🇿 Mustaqillik — bunyodkorlik, taraqqiyot va farovon kelajak demakdir!