Prezidentimiz tomonidan 2026 yil 14 may kuni sanoatlashgan intensiv mevali bog’lar barpo etish hamda eskirgan bog’larni yangilashni qo’llab-quvvatlash masalalariga bag’ishlab o’tkazilgan videoselektor yig’ilishida berilgan topshiriqlar ijrosini ta’minlash maqsadida Romitan tumanida keng ko’lamli amaliy ishlar olib borilmoqda.

Xususan, tumanning Hazorbog’ massivida faoliyat yuritayotgan 56 ta fermer xo’jaligi tomonidan jami 690 gektar maydonda bog’ va uzumzorlar parvarish qilinmoqda. Ushbu maydonlarning 420 gektarini uzumzorlar, 270 gektarini esa intensiv bog’lar tashkil etadi. Quvonarlisi, 96 gektar uzumzor maydonlarida zamonaviy tomchilatib sug’orish tizimi joriy qilingan bo’lib, bu suv tejamkorligi va hosildorlikni oshirishda muhim ahamiyat kasb etmoqda.

Shuningdek, hududdagi uzumzorlarni bosqichma-bosqich to’liq shpaler va voyish usuliga o’tkazish ishlari ham amalga oshirilmoqda. Bu esa uzumzorlarda agrotexnik tadbirlarni samarali tashkil etish, parvarish jarayonlarini yengillashtirish va sifatli hosil yetishtirish imkonini beradi.

Ayni paytda mazkur hududda faoliyat yuritayotgan “Agro Star” MChJ tomonidan qo’shimcha 50 gektar maydonda intensiv bog’lar barpo etish rejalashtirilgan. Bu kabi loyihalar aholini sifatli va eksportbop meva-sabzavot mahsulotlari bilan ta’minlash, yangi ish o’rinlari yaratish hamda eksport salohiyatini yanada oshirishga xizmat qiladi.

Davlat tomonidan sohani qo’llab-quvvatlash maqsadida mevali bog’ va tokzorlar barpo etish uchun banklar orqali 14 foizli, 7 yil muddatga, 3 yillik imtiyozli davr bilan kredit mablag’lari ajratilishi ham belgilab olingan. Bu esa fermer va tadbirkorlar uchun yanada keng imkoniyatlar yaratmoqda.

1-S.Ayniy saylov okrugi deputati, Romitan tuman hokimi U.Barnoyev boshchiligida mutasaddi tashkilot rahbarlari ushbu hududda bo’lib, amalga oshirilayotgan ishlar hamda kelgusida bajarilishi lozim bo’lgan vazifalar bilan yaqindan tanishdilar.

Shu bilan birga, tumandagi fermer xo’jaliklari tokzorlariga o’rnatilgan shpalerlar uchun davlat subsidiyalari ajratilishida Agrosanoatni rivojlantirish agentligining tuman bo’limi tomonidan amaliy ko’mak ko’rsatilmoqda. Natijada ko’plab xo’jaliklar davlat subsidiyalaridan samarali foydalanish imkoniga ega bo’lib, bu tokzorlarni yanada rivojlantirish va hosildorlikni oshirishga xizmat qilmoqda.

Mazkur ishlar deputatlar tomonidan ham doimiy nazoratga olingan bo’lib, sohada amalga oshirilayotgan islohotlar ijrosi, fermerlarga yaratilayotgan imkoniyatlar va aholini sifatli mahsulotlar bilan ta’minlash borasidagi ishlar izchil monitoring qilib borilmoqda.