Oʻzbekiston Respublikasi Prezidentining 2025-yil 1-apreldagi “Respublika hududlarini jadal
kompleks rivojlantirish uchun tanlab olingan tuman (shahar)larda amaliy
chora-tadbirlarni amalga oshirish toʻgʻrisida”gi PQ-132-son Qaroriga muvofiq,
Quva tumani Mustaqillik mahalla fuqarolar yigʻini hududida yirik investitsiya
loyihasini amalga oshirish belgilangan. Xususan, 15 gektar yer maydonida
“ENERGY-LAND” qoʻshma korxona shaklidagi MCHJ tomonidan umumiy qiymati 50
million AQSH dollariga teng boʻlgan “Qishloq xoʻjaligi mahsulotlarini yigʻish
va taqsimlash” agrologistika markazini barpo etish rejalashtirilgan.

Mazkur qaror ijrosi doirasida olib borilayotgan ishlar xalq deputatlari Quva tuman
Kengashi deputatlari M.Sayfidinov, B.Abduraximov, Sh.Joʻrayev hamda B.Sharipovlar
tomonidan kotibiyat mudiri R.Nodirov rahbarligida atroflicha oʻrganildi.
Oʻrganish jarayonida loyihaning amalga oshirish bosqichlari, qurilish
ishlarining borishi, sifati va belgilangan muddatlarga muvofiqligi, shuningdek,
obyektni muhandislik-kommunikatsiya tarmoqlariga ulash ishlarining holati
tanqidiy-tahliliy asosda koʻrib chiqildi.

Shu bilan birga, ushbu loyihaning tuman iqtisodiyotini diversifikatsiya qilish, qishloq
xoʻjaligi mahsulotlarini saqlash, qayta ishlash va bozorlarga yetkazib berish
tizimini takomillashtirishdagi ahamiyati alohida taʼkidlandi. Agrologistika
markazi orqali mahsulotlarning sifatini saqlash, ularni eksportbop holatda
tayyorlash va tashqi bozorlarga chiqarish imkoniyatlarini kengaytirish koʻzda
tutilgani qayd etildi.

Loyiha toʻliq ishga tushirilishi natijasida hududda zamonaviy logistika infratuzilmasi
shakllanishi, yuzlab yangi ish oʻrinlari yaratilishi, aholi daromadlarining
oshishi hamda tumanning investitsiyaviy jozibadorligi sezilarli darajada
yuksalishi kutilmoqda. Shuningdek, loyihaning samarali amalga
oshirilishi yuzasidan tegishli masʼullarga aniq taklif va tavsiyalar berildi
hamda ijro jarayoni deputatlik nazoratiga olindi.

Slide 1 of 9