Xalıqtıń dárti menen jasaw, xalıqtıń mashqalalarına biypárwa bolmaw deputatlıq jumısınıń eń tiykarǵı hám juwapkershilikli baǵdarlarınan biri bolıp esaplanadı. Xalıq isenimi menen saylanǵan wákil ushın hár bir múrájat, hár bir shańaraqtıń táǵdiri ayrıqsha áhmietke ie. Ámeliy járdem, óz waqtında kórsetilgen kómek hám insanıylıq múnásibet bolsa jámiette óz-ara isenimdi bekkemleydi.

Jaqında Kegeyli rayonı "Jańabazar" awıl puqaralar jıyını aymaǵında jaylasqan "Paxtakesh" awılında baxıtız hádiyse júz berdi. Puqara Embergenov Miyrmannıń jasap atırǵan úyinde órt kelip shıǵıp, aqıbetinde úy jaramsız jaǵdayǵa kelip, shańaraq aǵzaları awır sınaqqa dus keldi. Bul jaǵday tek ǵana bir shańaraqtıń emes, al pútkil máhálleniń dártine aylandı.

Waqıyadan xabardar bolǵan usı aymaqtan Qaraqalpaqstan Respublikası Joqarǵı Keńesi deputatı B.Habibullaev, Xalıq deputatları rayonlıq Keńesi sekretariatınıń baslıǵı B.Iskenderov hámde Keńes deputatı M.Mırzataevlar bárinen burın, jábirlengen shańaraqtıń jaǵdayınan xabar alıp, házirgi jaǵdaydı hár tárepleme úyrendi.