Xalq deputatlari tuman Kengashi deputati Rustam Primqulov o‘z saylov okrugidagi 23-son maktabgacha ta’lim tashkilotida bo‘lib, muassasa faoliyati bilan yaqindan tanishdi. Tashrif davomida 125 o‘rinli mazkur bog‘chada tarbiyalanayotgan bolalar uchun yaratilgan shart-sharoitlar, xususan, ovqatlanish tizimi alohida e’tibor markazida bo‘ldi. Bolalar uchun tayyorlanayotgan taomlar sifati, ularning tarkibi va belgilangan sanitariya hamda gigiyena me’yorlariga muvofiqligi atroflicha o‘rganildi. Shuningdek, muassasa omborxonasidagi oziq-ovqat mahsulotlari zaxiralari ko‘zdan kechirilib, ularning saqlanish sharoitlari, yaroqlilik muddati hamda yetarli darajada zaxira mavjudligi tahlil qilindi. O‘rganishlar yakunida deputat tomonidan aniqlangan kamchiliklar yuzasidan tegishli mas’ullarga aniq tavsiyalar berildi. Bolalar salomatligi, sifatli va xavfsiz ovqatlanishini ta’minlash masalalari doimiy nazoratga olinishi alohida ta’kidlandi. Mazkur tashrif aholining ijtimoiy sohadagi muammolarini joyida o‘rganish, ularni tezkor bartaraf etish hamda tizim faoliyatini yanada takomillashtirishga xizmat qiladi.