🔹Xalq deputatlari Marg‘ilon shahar Kengashi raisi O.Axmatshayev tomonidan Toshkesar mahalla fuqarolar yig‘inida saylovchilar bilan navbatdagi uchrashuv tashkil etildi. Mazkur uchrashuv aholining muammolarini o‘rganish, ularning taklif va tashabbuslarini eshitish hamda joylarda mavjud masalalarga yechim topish maqsadida o‘tkazildi.

🔹Uchrashuvda viloyat Kengashi deputati Z.G‘ofurova, shahar Kengashi kotibiyati mudiri A.Ermatov, hudud deputati X.Mashrabayeva, shahar Kengashi deputati A.Mahkamov, “Madad” nodavlat notijorat huquqiy maslahat byurosi Marg‘ilon shahar bosh mutaxassisi S.Ismoilov, shuningdek mahalla yettiligi vakillari, obodonlashtirish bo‘limi boshlig‘i o‘rinbosari hamda kommunal soha mutasaddilari ishtirok etdilar.

🔹Muloqot davomida fuqarolar o‘zlarini qiynab kelayotgan bir qator dolzarb masalalar bilan murojaat qildilar. Xususan, oqava suv tizimidagi muammolar, hududdagi ichki yo‘llarni asfaltlashtirish zarurati, shuningdek kadastr hujjatlarini rasmiylashtirish bilan bog‘liq masalalar ko‘tarildi. Har bir murojaat atroflicha tinglanib, mas’ullar ishtirokida muhokama qilindi.

🔹Kengash raisi tomonidan bildirilgan muammolarni bartaraf etish yuzasidan tegishli tashkilotlarga topshiriqlar berilib, ijrosini nazoratga olish belgilandi. Ayrim masalalar joyida hal etilgan bo‘lsa, qo‘shimcha o‘rganishni talab etadigan murojaatlar bo‘yicha tegishli tartibda ishlar olib borilishi ma’lum qilindi.
Bunday ochiq muloqotlar aholi bilan bevosita ishlash, ularning dardini eshitish va amaliy yechimlar topishda muhim ahamiyat kasb etadi. Xalq deputatlari Marg‘ilon shahar Kengashi tomonidan bu kabi uchrashuvlar davom etadi.