Sessiya ishida tuman hokimi Jahongir Nazarov ishtirok etib, joriy yilning 23-yanvar kuni hurmatli Prezidentimiz raisligida o‘tkazilgan videoselektor yigʻilishida belgilab berilgan ustuvor vazifalardan kelib chiqib, kambag‘allikni qisqartirish va aholi bandligini ta’minlash bo‘yicha 2026-yilda rahbarlar va mahalla raislari oldida turgan asosiy vazifalar yuzasidan tuman aholisi va faollariga murojaat qildi.

Tuman hokimi o‘z murojaatida aholi turmush farovonligini yuksaltirish, mahallalar infratuzilmasini yaxshilash, kambag‘allikni qisqartirish va bandlikni ta’minlash, qurilish va kommunal tarmoqda bunyodkorlik va obodonlashtirish, xorijiy investitsiyalarni jalb qilish va eksport imkoniyatlarini oshirish bo‘yicha joriy yilda ko‘zda tutilgan maqsad va dasturlar haqida batafsil ma’lumot berdi, bu borada amalga oshirilgan ishlarga to‘xtaldi.

Sessiya davomida mahalla faollari, nuroniylar, deputatlar tuman rahbari tomonidan bildirilgan fikrlar, o‘rtaga qo‘yilgan vazifalarni yakdillik bilan qo‘llab-quvvatladilar hamda o'zlarining fikr-mulohazalarini bildirdilar.