Xalq deputatlari Parkent tuman Kengashiga 24-«Tolbuloq» saylov okrugidan saylangan deputat Uboydullayeva Yulduz Abrorjonovna tomonidan saylov okrugidagi mavjud muammolarni o‘rganish hamda aholi murojaatlari va takliflari asosida Parkent tumani hokimi o‘rinbosari Sh. Akramovga deputat so‘rovi yuborilgan edi.
Mazkur deputat so‘rovida O‘zbekiston Respublikasi Vazirlar Mahkamasining 2025-yil 1-avgustdagi 489-sonli qarori ijrosi, xususan, «Tolbuloq» mahalla fuqarolar yig‘ini hududidagi 8 kilometr yo‘lni asfaltlashtirish hamda 500 ta eskirgan simyog‘ochni yangilariga almashtirish bo‘yicha rejalashtirilgan chora-tadbirlar va amalga oshirilayotgan ishlar yuzasidan asoslantirilgan ma’lumot so‘ralgan.
Parkent tumani hokimligining 2026-yil 14-oktabrdagi 5406-sonli rasmiy javob xatida quyidagilar ma’lum qilingan:
✅ Yo‘llarni asfaltlashtirish: «Tolbuloq» MFY hududidagi 8 kilometr yo‘lni asfaltlashtirish ishlari mahalliy budjet mablag‘lari hisobidan 2027-yil yakuniga qadar bosqichma-bosqich amalga oshirilishi rejalashtirilgan.
✅ Elektr infratuzilmasini yaxshilash: Mahalla hududidagi eskirgan simyog‘ochlarni yangi temir-beton ustunlarga almashtirish bo‘yicha loyihalar ishlab chiqilgan. Mazkur ishlarni respublika budjeti mablag‘lari hisobidan moliyalashtirish belgilangan bo‘lib, hozirda zarur mablag‘lar ajratilishi kutilmoqda.
✅ Deputatlik so‘rovi orqali hudud infratuzilmasiga oid dolzarb masalalar vakolatli tashkilotlar e’tiboriga yetkazilib, ularning hal etilishi yuzasidan rasmiy ma’lumot olindi.
‼️ Xalq deputatlari Parkent tuman Kengashi deputatlari tomonidan saylovchilar murojaatlarini o‘rganish, mavjud muammolarni vakolatli tashkilotlar oldiga qo‘yish hamda ularning qonuniy hal etilishi ustidan deputatlik nazoratini amalga oshirish ishlari davom ettiriladi.