YAKKASADA MAHALLASIDA XOTIN-QIZLAR FAOLIYATI O‘RGANILDI

Xalq deputatlari Namangan shahar Kengashi deputati S. Gapparova tomonidan Yakkasada mahallasi xotin-qizlar faoli Gulchehra Mo‘minovaning faoliyati o‘rganildi.

Shuningdek, mahallada istiqomat qiluvchi bir guruh xotin-qizlar bilan suhbat o‘tkazildi.

Suhbat davomida xotin-qizlarning kundalik hayoti, ularni qiynayotgan masalalar, mavjud muammolar hamda ularning taklif va mulohazalari tinglandi. 

Mahallada xotin-qizlarni qo‘llab-quvvatlash, ularning muammolarini o‘z vaqtida aniqlash va hal etish, bandligini ta’minlash hamda ijtimoiy faolligini oshirishga qaratilgan ishlar yuzasidan fikr almashildi.

O‘rganish jarayonida xotin-qizlar faoli tomonidan amalga oshirilayotgan ishlar, aholi bilan muloqot qilish, ehtiyojmand oilalarni aniqlash va ularga ko‘mak ko‘rsatish borasidagi faoliyatga e’tibor qaratildi.

Mazkur o‘rganish mahalliy Kengash deputati faoliyatining eng muhim yo‘nalishlari bo‘yicha tavsiyalarning xotin-qizlarni qo‘llab-quvvatlash, aholi bandligini ta’minlash va ijtimoiy himoyaga muhtoj fuqarolar bilan ishlashga oid yo‘nalishlari doirasida amalga oshirildi.

Shuningdek, mavzuga muvofiq, O‘zbekiston Respublikasining 

2019-yil 2-sentabrdagi O‘RQ-562-son “Xotin-qizlar va erkaklar uchun teng huquq hamda imkoniyatlar kafolatlari to‘g‘risida”gi Qonuni o‘rganildi. 

Qonunda belgilangan talablar asosida xotin-qizlarning huquq va manfaatlarini himoya qilish, ular uchun teng imkoniyatlar yaratish masalalariga e’tibor qaratildi.

O‘rganish va suhbatlar davomida bildirilgan taklif hamda murojaatlarni ko‘rib chiqish, aniqlangan muammolar yuzasidan tegishli choralar ko‘rish va mahallada xotin-qizlar bilan ishlash samaradorligini oshirish muhimligi ta’kidlandi.

Bunday uchrashuvlar aholi bilan bevosita muloqotni mustahkamlash, fuqarolar muammolarini joyida aniqlash va ularning yechimi yuzasidan deputatlik nazoratini amalga oshirishga xizmat qiladi.