Xalq deputatlari Marg‘ilon shahar Kengashining Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi yig‘ilishida A.Navoiy ko‘chasini milliy uslub va zamonaviy me’moriy yechimlar uyg‘unligida qayta shakllantirish loyihasi muhokama qilindi.

Yig‘ilishda Kengash raisi O.Axmatshayev, kotibiyat mudiri A.Ermatov ishtirok etdi. Doimiy komissiya raisi E.Yunusov boshchiligida o‘tgan muhokamada shahar qiyofasini yanada obod etish, ko‘cha infratuzilmasini takomillashtirish va loyihani amalga oshirish bilan bog‘liq masalalarga e’tibor qaratildi.

Shahar qurilish va uy-joy kommunal bo‘limi boshlig‘i A.Ahadjonov deputatlarga A.Navoiy ko‘chasini milliy uslubda va zamonaviy ko‘rinishga keltirish bo‘yicha ishlab chiqilgan loyiha taklifi chizmasini taqdim etdi. Unda ko‘chaning me’moriy qiyofasini yangilash, tungi bezak chiroqlarini o‘rnatish va hududni obodonlashtirishga qaratilgan yechimlar namoyish etildi.

Deputatlar loyiha chizmasi bilan tanishib, uning turli jihatlari yuzasidan o‘z fikr va takliflarini bildirdilar. Muhokamada Marg‘ilon shahar hokimining qurilish, to‘siqlarsiz muhit yaratish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari vazifasini bajaruvchi R.To‘xtasinov ham o‘z munosabatini bildirib, loyihani shaharsozlik va infratuzilma talablari bilan uyg‘un holda amalga oshirish masalalariga to‘xtaldi.

Shuningdek, yig‘ilishda ekspert-maslahat guruhi a’zosi, “Nuroniy” jamg‘armasi shahar bo‘limi boshlig‘i S.Toshpo‘latov ko‘kalamzorlashtirilgan hududlarni saqlash va yashil maydonlarni muntazam sug‘orish imkonini beruvchi tizimni ham loyiha doirasida ko‘zda tutish yuzasidan takliflarini ilgari surdi.

Muhokamalar davomida loyiha nafaqat ko‘chaning tashqi ko‘rinishini yangilash, balki uning qulayligi, obodonligi va uzoq muddat davomida saqlanib qolishini ta’minlash nuqtayi nazaridan ham ko‘rib chiqildi.

Zero, shahar qiyofasini o‘zgartirish — bu shunchaki binolar va ko‘chalarni bezash emas. Bu milliy o‘zlikni aks ettiradigan, zamonaviy talablarga javob beradigan va aholi uchun qulay muhit yaratishga xizmat qiladigan yaxlit yondashuvdir.