Xalq deputatlari Termiz shahar Kengashi deputati Xayrullo Jurayev tomonidan fuqarolar xavfsizligini ta’minlash, yo‘l harakatini tartibga solish hamda hududda qulay sharoit yaratish maqsadida “Saxovat” mahallasidagi Mehridaryo va Fayoztepa ko‘chalari kesishmasiga svetofor o‘rnatish yuzasidan deputatlik so‘rovi yuborilgan edi.

Mazkur masala deputatlik nazorati doirasida ko‘tarilib, tegishli tashkilotlar e’tiboriga yetkazildi. Murojaatda ushbu chorrahada transport vositalari va piyodalar harakatini tartibga solish, yo‘l harakati xavfsizligini ta’minlash hamda fuqarolar uchun xavfsiz harakatlanish sharoitlarini yaxshilash zarurligi qayd etilgan.

Bugungi kunda deputatlik so‘rovida ko‘tarilgan masala yuzasidan amaliy chora ko‘rilib, Mehridaryo va Fayoztepa ko‘chalari kesishmasiga svetofor moslamasi o‘rnatildi.

Mazkur ishlar, avvalo, hudud aholisi va yo‘l harakati ishtirokchilarining xavfsizligini ta’minlash, chorrahadagi harakatni tartibga solish hamda ehtimoliy yo‘l-transport hodisalarining oldini olishga xizmat qiladi.

Deputatlik so‘rovlarining amaliy natija bilan yakunlanishi — fuqarolar murojaatlari va hududdagi mavjud muammolarni hal etishda deputatlik nazoratining muhim vosita ekanini ko‘rsatadi.

Xalq deputatlari Termiz shahar Kengashi deputatlari tomonidan aholi murojaatlarida ko‘tarilayotgan masalalarni o‘rganish, tegishli tashkilotlarga yo‘naltirish va ularning ijrosini nazorat qilish ishlari izchil davom ettirilmoqda.