O‘zbekiston Respublikasi Prezidentining PQ–406-son qarori, Oliy Majlis Senati Kengashining KQ–35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya asosida 15-Zuhro saylov okrugi deputati, Xalq deputatlari Marg‘ilon shahar Kengashi kotibiyati mudiri A.Ermatov tomonidan deputat M.Mirzayev hamrohligida saylov okrugi hududidagi 36-maktabgacha ta’lim tashkilotida olib borilayotgan mukammal ta’mirlash ishlari o‘rganildi.

O‘rganish jarayonida ta’lim tashkilotida amalga oshirilayotgan qurilish-ta’mirlash ishlarining borishi, obyektda yaratilayotgan sharoitlar hamda ishlarning belgilangan talablar asosida tashkil etilishi ko‘zdan kechirildi.

Mazkur o‘rganish O‘zbekiston Respublikasining “Maktabgacha ta’lim va tarbiya to‘g‘risida”gi O‘RQ–595-son Qonunida belgilangan vazifalar ijrosini ta’minlash nuqtayi nazaridan ham muhim ahamiyatga ega. Xususan, qonunning 4-moddasida maktabgacha ta’lim va tarbiyaning asosiy prinsiplaridan biri sifatida bolalarga ta’lim va tarbiya berish uchun ularning rivojlanish xususiyatlari hamda sog‘lig‘i holatiga mos shart-sharoitlar yaratish belgilangan.

Shuningdek, qonunning 3-moddasida maktabgacha ta’lim va tarbiya davlat standarti maktabgacha ta’lim tashkilotlarini qurish va jihozlash, bolalarning sog‘lom ovqatlanishi hamda xavfsizligini tashkil etishga doir majburiy talablar majmuini nazarda tutishi belgilangan.

Shu jihatdan, mukammal ta’mirlash jarayonini o‘rganish davomida binoning umumiy holati bilan bir qatorda bolalar xavfsizligi, sanitariya-gigiyena sharoitlari, muhandislik-kommunikatsiya tarmoqlari, isitish, suv ta’minoti, elektr tizimi hamda tarbiyalanuvchilar uchun qulay va xavfsiz muhit yaratish masalalariga alohida e’tibor qaratildi.

Mazkur Qonunning 13-moddasida mahalliy davlat hokimiyati vakillik organlarining maktabgacha ta’lim va tarbiya sohasidagi hududiy dasturlarni tasdiqlashi hamda ularning ijrosi ustidan nazoratni amalga oshirishi belgilangan.

Shundan kelib chiqib, deputatlik nazorati doirasidagi mazkur o‘rganishning asosiy maqsadi — amalga oshirilayotgan ta’mirlash ishlarining natijadorligini ta’minlash, aniqlangan muammolarni o‘z vaqtida bartaraf etish hamda kelgusida maktabgacha ta’lim tashkilotida bolalar uchun zamonaviy, xavfsiz va qulay shart-sharoitlar yaratilishiga ko‘maklashishdan iborat.

Xalq deputatlari Marg‘ilon shahar Kengashi deputatlari tomonidan hududlarda ijtimoiy soha obyektlarining holatini o‘rganish, qonunchilik hujjatlari ijrosini nazorat qilish hamda fuqarolar uchun yaratilayotgan shart-sharoitlarni yaxshilashga qaratilgan deputatlik nazorati tadbirlari izchil davom ettiriladi.