ДЕПУТАТЛИК СЎРОВИ АМАЛДА: ШИФОКОРЛИК ПУНКТИДА ТАЪМИРЛАШ ИШЛАРИ БОШЛАНДИ
Халқ депутатлари Янгиқўрғон тумани Кенгаши котибиятининг иш режасига асосан, Кенгаш котибияти мудири Эргашева Мунисхон Рустамбековна Ғайистон маҳалла фуқаролар йиғини раиси иштирокида 24-Нурафшон сайлов округидаги шифокорлик пунктида олиб борилаётган таъмирлаш ишларини ўрганди.
Мазкур тиббиёт муассасасининг мавжуд ҳолатини яхшилаш юзасидан ҳудуд депутати Ф. Отабоев томонидан тегишли ташкилотга депутатлик сўрови юборилган эди. Ушбу депутатлик сўрови натижасида айни пайтда шифокорлик пунктида таъмирлаш ва ободонлаштириш ишлари бошланган.
Хусусан, бинонинг ташқи фасад қисмини таъмирлаш, муассаса ҳудудини девор билан ўраш, атрофини тартибга келтириш ва ободонлаштириш ишлари амалга оширилмоқда. Ушбу чора-тадбирлар аҳолига сифатли тиббий хизмат кўрсатиш ҳамда тиббиёт ходимлари учун муносиб меҳнат шароитларини яратишга қаратилган.
Ўрганиш жараёнида бажарилаётган ишларнинг сифати, белгиланган муддатларга риоя қилиниши ва таъмирлаш ишларини тўлиқ якунлаш масалаларига алоҳида эътибор қаратилди. Масъулларга ишларни сифатли ва белгиланган талаблар асосида амалга ошириш бўйича тегишли тавсиялар берилди.
Шифокорлик пунктидаги таъмирлаш ва ободонлаштириш ишларининг бориши Халқ депутатлари Янгиқўрғон тумани Кенгаши ҳамда ҳудуд депутати томонидан депутатлик назоратига олинди.