Xalq deputatlari Marg‘ilon shahar Kengashining “Ijtimoiy soha, yoshlar siyosati, madaniyat va sport masalalari bo‘yicha” doimiy komissiyasi a’zosi, deputat Sh. Madaminova o‘ziga biriktirilgan Inson ijtimoiy xizmatlari markazining hududlardagi faoliyatini o‘rganish maqsadida Uvaysiy MFYda bo‘lib, ijtimoiy xodim L. Ro‘ziboyeva faoliyati bilan yaqindan tanishdi.

O‘rganish davomida ijtimoiy himoyaga muhtoj fuqarolarning turmush sharoitini yaxshilash, xonadonlarni energiya tejamkorlik talablari asosida ta’mirlash borasida amalga oshirilgan ishlar ko‘zdan kechirildi.

Mazkur o‘rganish Xalq deputatlari Marg‘ilon shahar Kengashining 2026-yil 30-martdagi VII-22-23-11-168-K/26-son qarori ijrosi doirasida tashkil etildi. Qaror O‘zbekiston Respublikasi Prezidentining 2025-yil 30-yanvardagi PF-17-son Farmoni hamda 2026-yil 5-fevraldagi PQ-49-son qarori ijrosini ta’minlash, ijtimoiy himoyaga muhtoj fuqarolarning uy-joylarini energiya samaradorligi asosida modernizatsiya qilish va yashash sharoitlarini yaxshilashga qaratilgan.

O‘rganish davomida Uvaysiy MFY, Bayram ko‘chasi, 32-uyda istiqomat qiluvchi fuqaro O.Avazovning xonadoni ham ko‘zdan kechirildi.

Ma’lumotlarga ko‘ra, 2026-yil aprel oyida maxsus tuzilgan komissiya tomonidan xonadon o‘rganilib, mavjud muammolar asosida iyun oyida nuqson dalolatnomasi rasmiylashtirilgan.

Tasdiqlangan nuqson dalolatnomasiga muvofiq, xonadonni energiya tejamkor holatga keltirish uchun ichki va tashqi devorlarni ta’mirlash, eshik va romlarni yangilash, fasad qismini ta’mirlash, isitish tizimiga radiator va qozon o‘rnatish kabi ishlarni amalga oshirish belgilangan.

Qurilish-montaj ishlari “FAYZ MUMTOZ NE’MATI” MChJ tomonidan olib borilib, 2026-yil iyul oyida to‘liq yakunlangan. Xonadonni energiya tejamkor qilib ta’mirlash bo‘yicha nuqson dalolatnomasida belgilangan barcha ishlar bajarilgan va buning uchun 60,1 million so‘m mablag‘ sarflangan.

Deputat Sh.Madaminova tomonidan o‘tkazilgan o‘rganish davomida bajarilgan ishlarning holati joyiga chiqib ko‘zdan kechirilib, mazkur yo‘nalishda ijtimoiy himoyaga muhtoj fuqarolar uchun yaratilayotgan sharoitlar tahlil qilindi.

Bunday o‘rganishlar aholining ijtimoiy himoyasini kuchaytirish, davlat tomonidan ajratilayotgan mablag‘larning maqsadli va samarali sarflanishini ta’minlash hamda fuqarolarning munosib yashash sharoitlarini yaratishda deputatlik nazoratining amaliy ahamiyatini yanada oshiradi.