Янгиқўрғон туманида доимий комиссиялар қарорлари лойиҳаларини тайёрлаш бўйича амалий семинар ўтказилди
Халқ депутатлари Янгиқўрғон тумани Кенгашида доимий комиссиялар фаолияти самарадорлигини ошириш, комиссия қарорлари лойиҳаларини қонунчилик талаблари асосида сифатли тайёрлаш ҳамда ягона иш услубини шакллантириш мақсадида амалий ўқув семинари ташкил этилди.
Семинар давомида Халқ депутатлари Наманган вилояти Кенгаши котибияти мудири Т.Гаппаров томонидан доимий комиссия қарорлари лойиҳаларини тайёрлаш тартиби, уларнинг мазмун ва шаклига қўйиладиган талаблар, ҳуқуқий асосларни тўғри акс эттириш ҳамда қарор лойиҳаларини расмийлаштиришнинг муҳим жиҳатлари юзасидан атрофлича тушунтиришлар берилди.
Шунингдек, қарор лойиҳаларини амалда тайёрлаш бўйича намунавий ҳужжатлар асосида амалий кўникмалар шакллантирилди, учраётган муаммолар муҳокама қилиниб, уларни бартараф этиш бўйича тегишли тавсиялар берилди.
Мазкур ўқув семинари маҳаллий Кенгашлар фаолиятида ҳужжатлар сифатини янада ошириш, доимий комиссиялар ишини самарали ташкил этиш ҳамда сессияларга киритиладиган масалаларни пухта тайёрлашга хизмат қилиши таъкидланди