Yurtimizda “Mahalla obodligi va mehr-saxovat oyligi” doirasida hududlarni obodonlashtirish, yashil maydonlarni asrab-avaylash va atrof-muhitga mas’uliyatli munosabatni kuchaytirishga alohida e’tibor qaratilmoqda.
Ushbu ezgu maqsadlardan kelib chiqib, xalq deputatlari Chilonzor tuman Kengashi deputati Xusainov Alisher Abduvahobovich tomonidan Chilonzor tumani “Al-Xorazmiy” MFY hududidagi yashil maydonlar holati o‘rganildi.
O‘rganish davomida ayrim daraxtlarning tag qismlari beton bilan qoplanganligi aniqlandi.
Bu holat daraxt ildizlarining namlik va havo olishi hamda sog‘lom rivojlanishiga salbiy ta’sir ko‘rsatishi mumkin.
Mazkur holatni bartaraf etish maqsadida deputat tashabbusi bilan amaliy ishlar tashkil etilib, daraxtlarning beton bilan qoplangan tag qismlari ochildi, atrofi tozalanib, tartibga keltirildi.
Natijada daraxtlarning erkin rivojlanishi uchun qulay sharoit yaratilib, “Al-Xorazmiy” MFY hududining ekologik va estetik qiyofasi yanada yaxshilandi.
Shuningdek, bu kabi amaliy ishlar deputatlik faoliyatining muhim jihatini — hududni muntazam o‘rganish, mavjud muammolarni o‘z vaqtida aniqlash va ularni amaliy choralar orqali bartaraf etish tamoyilini namoyon etadi.
Zero, har bir asrab-avaylangan daraxt — tabiatga e’tibor, har bir obod hudud esa ekologik farovonlik sari qo‘yilgan muhim qadamdir.