Xalq deputatlari Chilonzor tumani Kengashining 5-Charx Kamolon saylov okrugi deputati Mahmudova Donoxon Artikovna tomonidan hududdagi mahalla faollari hamda “Bunyodkor" ko'chasi ko‘chaboshisi ishtirokida joyiga chiqqan holda o‘rganish ishlari olib borildi.

O‘rganish davomida mahalla ichki ko‘chalarining mavjud holati, yo‘l qoplamalarining sifati, piyodalar harakati uchun yaratilgan sharoitlar, shuningdek, ko‘chalarni tungi vaqtda yoritish tizimining holati atroflicha ko‘zdan kechirildi.

Hudud aholisi tomonidan bildirilgan murojaatlar va takliflar asosida ichki ko‘chalarda ta’mirlash ishlarini amalga oshirish, yoritish tizimini yaxshilash, qo‘shimcha chiroq ustunlarini o‘rnatish hamda mavjud infratuzilmani bosqichma-bosqich takomillashtirish yuzasidan tegishli chora-tadbirlarni belgilash masalalari muhokama qilindi.

Deputat tomonidan aniqlangan muammolarni bartaraf etish bo‘yicha mutasaddi tashkilotlarga tegishli tartibda murojaatlar kiritilishi hamda mazkur masalalarning ijrosi deputatlik nazoratiga olinishi ta’kidlandi.

Hududlarda obodonlashtirish, xavfsiz va qulay yashash muhitini yaratish, aholi murojaatlarini o‘z vaqtida hal etish borasidagi ishlar izchil davom ettirilmoqda.