Xalq deputatlari Pastdarg‘om tumani Kengashining navbatdagi sessiyasi kun tartibiga kiritilgan tuman Suv ta’minoti bo‘limi rahbarining hisoboti oldidan hududlarda o‘rganish ishlari davom etmoqda.
Mazkur sessiya oldi o‘rganishlar doirasida Xalq deputatlari Pastdarg‘om tumani Kengashi deputati M.Pardayev tomonidan Go‘zalkent MFY hududida joylashgan ko‘p qavatli uylar holati o‘rganildi.
O‘rganish davomida ko‘p qavatli uylarning yerto‘lalari, qurilish qismlari, fasad holati, obodonlashtirish ishlari ko‘zdan kechirildi hamda ushbu uylarda istiqomat qiluvchi aholi bilan suhbat o‘tkazildi.
O‘rganish va aholi bilan muloqot jarayonida quyidagi muammolar aniqlandi:
🔹 Ko‘p qavatli uylar foydalanishga topshirilganiga ko‘p vaqt bo‘lmagan bo‘lsa-da, ayrim uylarning fasad qismlari ta’mirtalab holatga kelib qolgani aholi tomonidan bildirildi.
🔹 Ayrim uylarning yerto‘lalari yopiq va qulflanganligi sababli to‘liq o‘rganish imkoniyati bo‘lmadi. Aholi ma’lumotiga ko‘ra, yerto‘lalarda jiddiy muammo mavjud emas, suv quvurlari va kanalizatsiya tizimi ishchi holatda ekanligi qayd etildi.
🔹 Ochiq holdagi ayrim yerto‘lalarda esa tozalik talablariga rioya qilinmagani, chiqindilar tashlangani, qarovsiz holatga kelgani, ayrim joylarda esa suv quvurlaridan sizib chiqish holatlari kuzatildi.
🔹 Shuningdek, hududda ayrim fuqarolar tomonidan maishiy chiqindilarni belgilangan joylarga emas, tartibsiz ravishda tashlab ketish holatlari aniqlandi.
Aniqlangan muammolar yuzasidan tegishli tashkilotlarga taklif va tavsiyalar kiritilib, masalalar deputatlik nazoratiga olindi.