Xalq deputatlari Shovot tumani Kengashining haftalik tasdiqlangan ish rejasiga muvofiq, 9-Yangiobod saylov okrugi deputati Xasanova Durdona Otaxonovna tomonidan saylov okrugidagi aholiga ko‘rsatilayotgan tibbiy xizmatlar sifati o‘rganildi.
O‘rganish ishlari 10-son oilaviy shifokorlik punktida olib borildi. Jarayonda birlamchi tibbiy xizmatlar sifati, bemorlar uchun yaratilgan sharoitlar, muolaja xonalarining holati, zarur tibbiy jihozlar va dori-darmonlar bilan ta’minlanganlik darajasi ko‘zdan kechirildi. Shuningdek, dori vositalarining yaroqlilik muddati hamda saqlash sharoitlariga alohida e’tibor qaratildi.
Bundan tashqari, tibbiyot xodimlarining bemorlar bilan muomala madaniyati, fuqarolar murojaatlariga o‘z vaqtida munosabat bildirilishi, profilaktik ko‘riklar va patronaj xizmatlarining tashkil etilishi o‘rganildi. Muassasada tibbiy hujjatlarning yuritilishi hamda tibbiy xizmat ko‘rsatish sifati amaldagi talablar asosida baholandi.
O‘rganish yakunlari bo‘yicha aniqlangan holatlar yuzasidan mas’ul tibbiyot xodimlariga tegishli tavsiyalar berildi hamda aholiga sifatli va uzluksiz tibbiy xizmat ko‘rsatishni yanada takomillashtirish bo‘yicha zarur vazifalar belgilandi.