Xalq deputatlari Bo‘stonliq tumani Kengashining 2026-yilga mo‘ljallangan Ish rejasiga muvofiq O‘zbekiston Xalq demokratik partiyasidan saylangan deputat Y.Xolmurotov tomonidan tumanda xotin-qizlarni qo‘llab-quvvatlash, ularning ta’lim olishi, kasb-hunar va zamonaviy ko‘nikmalarni egallashi, tadbirkorlik faoliyatiga jalb etilishi, shuningdek erta turmush va ajrimlarning oldini olish borasida amalga oshirilayotgan ishlar holati o‘rganildi.

🔺O‘rganish davomida tuman Oila va xotin-qizlar bo‘limining sohaga oid dasturlar va chora-tadbirlarning ijrosi tahlil qilindi. Deputat tomonidan bo‘lim boshlig‘i L.Shodiyeva bilan suhbat o‘tkazilib, xotin-qizlarning ta’lim muassasalariga jalb etilishi, kasb-hunarga o‘qitish kurslari tashkil etilishi, ishsiz xotin-qizlarni bandlikka yo‘naltirish hamda ularni tadbirkorlik faoliyatiga keng jalb qilish bo‘yicha olib borilayotgan ishlar yuzasidan ma’lumotlar tinglandi.

🔺Shuningdek, erta nikoh va oilaviy ajrimlarning oldini olish maqsadida mahallalarda olib borilayotgan profilaktik tadbirlar, yoshlar va ota-onalar bilan tashkil etilayotgan uchrashuvlar, psixologik va huquqiy maslahatlar berish amaliyoti ham atroflicha muhokama qilindi.

🔺Suhbat davomida xotin-qizlarning ijtimoiy faolligini oshirish, ularning huquq va manfaatlarini himoya qilish, og‘ir ijtimoiy ahvolga tushib qolgan ayollarni qo‘llab-quvvatlash, shuningdek, oilalarda sog‘lom ma’naviy muhitni shakllantirish borasida amalga oshirilayotgan ishlarga alohida e’tibor qaratildi. O‘rganish yakunlari sohadagi ishlarni yanada samarali tashkil etish va aniqlangan kamchiliklarni bartaraf etish bo‘yicha tegishli taklif va tavsiyalar bildirildi.